BEMAʼNI ODATLAR OBROʻ KELTIRMAYDI
Ayni kunlarda mamlakatimiz boʻylab toʻy-marosimlarda, turli oilaviy tantanalarda ortiqcha dabdababozlikka, isrofgarchilikka chek qoʻyish dolzarb mavzularning biriga aylangan. Afsuski, kun sayin toʻylar goʻyoki oilaning moddiy imkoniyatini koʻz-koʻz qiladigan poygaga oʻxshab ketayotgani bor gap...
Yaqinda ijtimoiy tarmoqlarda bir kelinning sepini yuklagan oltita yuk mashinaning turnaqator boʻlib ketayotganini koʻrib, men kabi hayratlangan odamlar koʻpchilikdir, degan xayolga bordim. Axir har qancha mol-u dunyo turmush qurayotgan yoshlarning baxtiga kafolat boʻlolmaydi-da. Qolaversa, qaynota, qaynona, kuyov boʻlayotgan insonlarning oriyati qayda qoldi?
Shunday xabarlarni oʻqiganimizda, albatta, har birimiz «bunday odatlar iloyo bizdan yiroq boʻlsin», deb qoʻyamiz. Chunki baʼzilarning bunchalik oʻzini koʻz-koʻz qilishi, qurbi yetmaganning dilini ogʻritadi. Shunday qilishga intilgan ota-onalar moddiy tarafdan qiynalib qolishi tayin.
– Keyingi vaqtlarda toʻy-marosimlarni ixchamlashtirish, toʻy bazmiga taklif etiluvchilar sonini qisqartirish va spirtli ichimliklar kamroq qoʻyilishi borasida ancha ijobiy oʻzgarishlarga erishayapmiz, – deydi “Bosuv” MFY diniy maʼrifat va maʼnaviy-axloqiy tarbiya masalalari boʻyicha maslahatchisi Hanifa Toʻrayeva. – Biroq keyingi vaqtlarda tobora urchib borayotgan nomaqbul odatlar ota-onalarni qiynab qoʻymoqda. Masalan, qiz uzatilsa, “gulyanka”da kelin boʻlmishning singlisi uchun alohida mashina ajratiladi. Bu goʻyoki unga hurmat emish. Buningdek nomaqbul odatlarning “bolalab” ketishining oldini olishga intilayapmiz.
Bu hayotda qanday yashash, topganini qanday sarflash har kimning oʻziga havola. Biroq, beʼmani odatlar kishiga obroʻ keltirmaydi. Aksincha, obroʻsini toʻkishini yodda tutishimiz kerak.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
