MIBning Amudaryo tumani boʻlimi tomonidan qanday ishlar amalga oshirilmoqda

Bugungi kunda mamlakatimizda barcha sohada tub islohotlar amalga oshirilmoqda. Islohotlar aholi turmush darajasini yaxshilash, iqtisodiyotni yuksaltirish, yurtimizni rivojlangan davlatlar qatoriga olib chiqishga qaratilgani bilan ahamiyatlidir. Bugungi davr har birimizdan mana shu islohotlarni amalga oshirishga munosib hissa qoʻshishimiz uchun faol boʻlishni talab qiladi.

Prezidentimiz Sh.Mirziyoyevning Oliy Majlisga Murojaatnomasida Oʻzbekistonni ijtimoiy-iqtisodiy rivojlantirishning eng ustuvor yoʻnalishlari koʻrsatib berildi. Mamlakatimizning yanada taraqqiy etishi uchun Murojaatnomada koʻrsatilgan bu ustuvor yoʻnalishlar barcha sohalar uchun dasturilamal boʻlib xizmat qiladi.

Murojaatnomada Yurtboshimiz mamlakatimizdagi asosiy energiya resurslari narxlari haqida soʻz yuritib, bizda energiya va tabiiy gaz resurslari rivojlangan davlatlarga nisbatan bir necha barobar arzonligini aytib oʻtdi. Lekin shunga qaramasdan, energiya resurslaridan oqilona foydalanilmayotgani haqida davlatimiz rahbari jon kuydirib soʻzladi.

Aholi va boshqa obʼektlarning elektr energiya va tabiiy gaz resurslari boʻyicha toʻlov intizomini mustahkamlashda ijro ishi yuritish maqsadida Majburiy ijro byurosi tomonidan qator ishlar amalga oshirilmoqda. Majburiy ijro byurosi tuman boʻlimi tomonidan 113 ta holatda noqonuniy energiya resurslaridan foydalanganlik boʻyicha dalillar qayd etilib, shundan elektr energiyadan 91 ta, tabiiy gazdan 22 ta holat aniqlandi.

Elektr energiyasidan noqonuniy foydalanganlik holati boʻyicha 74 nafar shaxslarga nisbatan maʼmuriy huquqbuzarlik ishi qoʻzgʻatildi. Surishtiruv davrida 42 mln. 688,4 ming soʻm zarar aniqlanib, shundan 24 mln. 895,8 ming soʻm undirildi.

Huquqbuzarlik sodir etgan shaxslarga nisbatan 63 mln. 467,1 ming soʻm maʼmuriy jarima qoʻllanilib, shundan 45 mln. 86,1 ming soʻm undirildi.

Tabiiy gazdan noqonuniy foydalanilganlik holati uchun 17 nafar shaxslarga maʼmuriy huquqbuzarlik ishi qoʻzgʻatildi. Surishtiruv davrida 10 mln. 969,2 ming soʻmlik zarar aniqlandi, shundan 10,9 mln. soʻm undirildi.

Huquqbuzarlik sodir etgan shaxslarga nisbatan 15,6 mln. soʻm maʼmuriy jarima qoʻllanilib, jarimalar toʻliq undirildi.

Majburiy ijro byurosi tuman boʻlimi tomonidan elektr energiya boʻyicha 760 mln. 686 ming soʻmlik qarzdorlik uchun yuridik shaxslarning hisob raqamlariga inkassa topshiriqnomalari qoʻyildi va shundan 258 mln. soʻm undirildi.

Yurtimizda iqtisodiy rivojlanishga erishish uchun elektr energiyasi, tabiiy gaz va ichimlik suvi manbalaridan oqilona foydalanishimiz hamda har biri uchun toʻlovlarni oʻz vaqtida amalga oshirib borishimiz lozim. Bu borada loqaydlikka yoʻl qoʻymasdan, toʻlovlarni amalga oshirishga eʼtiborli boʻlishimiz kerak.

Z.Saidmamudov, Majburiy ijro byurosi

tuman boʻlimi boshligʻi, 1-darajali yurist.