Amudaryo tumanida Prezident archasi shodiyonalari (+video)

Mamlakatimizda bolalar kelajagimiz vorislari, millatimiz davomchilari sifatida eʼzozlanadi. Poyoniga yetayotgan 2017-yil – Xalq bilan muloqot va inson manfaatlari yilida ertamiz egalarini har tomonlama kamolga yetkazish borasida keng koʻlamli ishlar amalga oshirildi. Bu ishlar bolajonlar uchun tashkil qilingan Prezident archasi bayram tadbirida yana bir marta eʼtirof etildi.

Davlatimiz rahbari Shavkat Mirziyoyev tashabbusi bilan yosh avlodni turli yot gʻoyalar, mafkuraviy tahdidlardan ishonchli himoyalash, ularning bilim va maʼnaviyatini yanada boyitishga qaratilgan koʻplab maʼrifiy loyihalar, amaliy chora-tadbirlar hayotga keng tatbiq etilmoqda.

Imkoniyati cheklangan yoshlarni har tomonlama qoʻllab-quvvatlash, Mehribonlik uylari tarbiyalanuvchilari, ota-onasiz yoki ularning qarovisiz qolgan bolalarga mehr va gʻamxoʻrlik koʻrsatishga alohida eʼtibor qaratilmoqda. Har yili Yangi yil bayrami arafasida bu saxovat va mehr nishonalari dillarda yana bir bor boʻy koʻrsatadi.

Yangi – 2018-yil arafasida ham 12 nomdagi oʻquv qurollari va 15 xil shirinliklardan tayyorlangan “Prezident sovgʻasi” mamlakatimizning barcha hududlarida uyushtirilayotgan “Prezident archasi” tantanalarida orziqqan yuraklarni shodliklarga toʻldirdi. 29-dekabr kuni tumanimizdagi “Istiqlol” toʻyxonasida rang-barang chiroqlar bilan bezalgan archa atrofida bayram tantanalari tashkil etilib, bolajonlarga “Prezident sovgʻasi”ning ulashilishi bu boradagi ishlarning yorqin ifodasidir.

Tadbirda tumanimiz hokimi Sultonboy Yoʻldoshev soʻzga chiqib, yigʻilganlarni Yangi yil bayrami munosabati bilan qizgʻin muborakbod etdi. 2017-yilda tumanimizda barcha sohalarda amalga oshirlgan ishlarni sarhisob qilib, kelgusi yil rejalari xususida toʻxtaldi. Tadbir mehmonlari ishtirokida 50 nafar bolajonlarga bayram sovgʻalari tantanali ravishda topshirildi.

“Prezident archasi” bayram tadbiri shukuhli va esda qolarli voqealarga boy boʻldi. Unda ijtimoiy koʻmakka muhtoj, kam taʼminlangan oilalar hamda Vatanimiz tinchligi va xavfsizligi yoʻlida halok boʻlganlarning farzandlari ishtirok etdi. Toʻyxona binosi bayramona oʻyinchoq va chiroqlar bilan bezatilgan archa atrofida Qorboboyu Qorqiz, turli ertak qahramonlari, taniqli sanʼatkorlar bir-biridan bejirim liboslar kiyib, bayramga oshiqqan bolajonlarni va mehmonlarni xushnudlik bilan kutib oldi. Bu yerda yangragan kuy-qoʻshiqlar, ertak qahramonlarining hazil-mutoyibalari yigʻilganlarga koʻtarinki kayfiyat ulashdi.

Jonajon Vatanimizda har bir inson aziz, uning qadr-qimmati yuksak. Shunga monand xalqimizning mehri daryo, saxovati ummon. Ayniqsa, farzandlarga mehr-muhabbat koʻrsatish azaliy qadriyatimiz. “Prezident archasi” bayram tantanalarida ham xalqimizning ana shunday insonparvarlik, mehr-oqibatlilik kabi ezgu fazilatlari yana bir bor namoyon boʻladi. Bu tadbir bolalarga quvonch, bir umrga unutilmas xotiralar tuhfa etadi.

...Chorlov musiqasi bolajonlarni ajoyib ertak-spektakl tomoshasiga chorladi. Tumandagi taʼlim muassasalarining ijodiy jamoalari tomonidan sahnalashtirilgan musiqiy chiqishla bayram qatnashchilari eʼtiboriga havola etildi. Qiziqarli sarguzashtlarga boy voqealar, kuy-qoʻshiqlar, raqslarni oʻzida jamlagan sahna koʻrinishi asnosida kichkintoylar ahillik, hamjihatlik, mehnatsevarlik, halollik, kattalarga hurmat, aql, odob insonga ziynat bagʻishlovchi fazilatlar ekanining guvohi boʻldi.

Tadbir nihoyasida barcha bolalar, yosh ijrochilar, bayram ishtirokchilari joʻrlikda “Prezident archasi” qoʻshigʻini ijro etdi.

Yangi yil munosabati bilan bayram tantanalari tumanimizdagi barcha taʼlim muassasalari, mehnat jamoalarida koʻtaringki ruhda davom etmoqda.