BOLAJONLAR UChUN YaNGI, KOʻRKAM BINO
Mamlakatimizda yosh avlod tarbiyasi va ularning komil insonlar boʻlib voyaga yetishlari uchun yetarli sharoit yaratishga alohida eʼtibor qaratib kelinmoqda. Bu oʻz navbatida ijobiy samara koʻrsatib, yoshlar har sohada yutuqlarga erishib kelmoqdalar va yurtimizni dunyoga tanitmoqdalar.
Taʼlim-tarbiya tizimidagi islohotlar davlatimiz siyosatining ustuvor yoʻnalishlaridan biri boʻlib kelayotganligi Prezidentimiz Sh.Mirziyoyevning qator farmon va qarorlarida oʻz ifodasini topmoqda.
Ayniqsa, maktabgacha taʼlim muassasalari yosh avlod tarbiyasida muhim oʻrin tutadi. Muassasada tarbiyalanayotgan bolajonlar maktab yoshiga yetgunga qadar koʻp narsalarni oʻrganib olishga ulguradi. Oʻzini tutish, tozalik, jismoniy tarbiyadan tortib, nutq oʻsishi, oʻqish va savodga tayyorgarlik kabilarning hammasini bola maktabgacha taʼlim muassasasida toʻliq oʻzlashtirib oladi. Bolalarda mustaqil shaxs tushunchasi shakllanib, qobiliyatlari ochiladi. Maktabgacha taʼlim muassasalari bolalarni tarbiyalash, oʻqitish, nazorat qilish, parvarishlash va sogʻlomlashtirishni taʼminlaydi.
Tumanimizda ham maktabgacha taʼlim muassasalari uchun yangi va barcha sharoitlarga ega binolar qurilib, foydalanishga topshirilmoqda. "Chordara” mahallasida joylashgan 3-sonli maktabgacha taʼlim muassasasi eski binoda faoliyat koʻrsatayotgan edi. Shu yilning may oyida "Temir beton” masʼuliyati cheklangan jamiyati tomonidan muassasa uchun yangi va koʻrkam bino qurilishi ishlari boshlab borildi. Qurilish uchun 1 milliard 100 million soʻm miqdorida mablagʻ ajratildi. Barcha sharoitlarga ega va zamonaviy taʼlim muassasasi binosi qurilishi oktyabr oyida yakunlanib, foydalanishga topshirildi. Qulay jihozlangan yangi bino 50-oʻringa moʻljallangan boʻlib, barcha talablarga javob beradi.
Yaqinda mazkur muassasa yangi binosining ochilish marosimi oʻtkazildi. Marosimda tuman hokimi oʻrinbosari Ulugʻbek Polvonov, "Temir beton” masʼuliyati cheklangan jamiyati quruvchilari, xalq taʼlimi boʻlimi xodimlari va mahalla faollari ishtirok etdilar.
Maktabgacha taʼlim muassasasi yangi binosining foydalanishga topshirilishi "Chordara” mahallasi ahli va jajji bolajonlarning cheksiz quvonchiga sabab boʻldi. Ishonamizki, yangi binoda oʻz faoliyatini boshlagan muassasada tarbiyalanayotgan bolajonlar kelajak bunyodkorlari va komil insonlar boʻlib voyaga yetadilar.
O.Xudoyberganova, jurnalist.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
