OʻZIMIZGA YaRAShADIGAN IShLAR QILAYLIK
Inson nima uchun yashaydi? Orzu-umidlardan bir goʻzal chaman yaratib, ana shu chaman ichra oʻzi yayrab, oʻzgalarga ezguliklar ulashib yashash – uning birdan-bir oliy maqsadi. Ana shunday toʻkin-sochin, fayzli hayot manziliga yetish uchun u umr boʻyi intiladi, mehnat qiladi.
Xalqimiz azaldan mehmondoʻst, bolajon va albatta orzu-havasli. Bugungi kunda bu orzu-havas ichida katta toʻy bersam, butun mahalla har kuni, har toʻyda ogʻzidan tushirmay aytib yursa, deb kim oʻzarga toʻy beruvchilar koʻpayib bormoqda. Ming afsuski, bunday toʻylar orqasidan koʻplab noxushliklar, isrofgarchiliklar, baʼzi bir toʻylarda avtohalokatlar yuz berib, ayrim yoshlar umrining oxirigacha nogiron boʻlib qolayotgan voqealar ham sodir boʻlmoqda. Bu voqealarni eshitib, koʻrib, bilib turib ham kim oʻzarga toʻy berish hech toʻxtamayapti. Kelin yoki kuyovning: "men falon mashinada chiqaman”, "falon soʻmlik kelin koʻylak, kostyum-shim kiyaman”, "falon qoʻshiqchi kelsin”, "toʻyim toʻyxonada boʻlsin!” degan talablariga kelin-kuyovning ota-onalari: "mayli, farzandlarimning koʻngli oʻksimasin”, deb rozi boʻlishmoqda. Ayrim hollarda kuyovning doʻstlari toʻy kuni bir xil mashinada chiqishi, yoʻlda mashinalarning poygasi, kelin qimmatbaho kelin koʻylak kiyishi, kelin-kuyovning romantik musiqa sadolari ostida maxsus bezatilgan sahnada raqsga tushishi oddiy hol boʻlib qolmoqda. Baʼzi bir ota-onalar "oʻzi bitta oʻgʻlim yoki yolgʻiz qizim” deb juda koʻp isrofgarchilikka yoʻl qoʻyishadi. Ertaga bu isrofgarchilikning uvoli tutadi-ku!
Aslida toʻy degani ikki yoshning ahdi-paymoni asosida, qonuniy va sharʼiy nikohdan oʻtib, yaqin qarindosh-urugʻini chaqirib, ularning duosini olish emasmi? Yetti mahallaga toʻy berib, boshdan-oyoq qarzga botib, toʻydan keyin chet davlatlarga chiqib ishlab, oʻz jonini oʻzi azobga qoʻyish toʻgʻrimi? Ayrim yoshlarimizdan ibo, hayo koʻtarilib, kattalar oldida uyalmaydigan boʻlib ketishyapti. Axir bir eslab koʻraylik, qaysi momo-bobolarimiz yoki ota-onamiz toʻyi kuni, odamlarning koʻz oʻngida quchoqlashib valsga tushgan, yetti mahallaga osh bergan, dabdabali toʻy qilaman deb qarz koʻtarishgan ekan? Ixchamgina toʻy berib ham baxtli hayot kechirishgan-ku!
Toʻgʻri, odam bu dunyoga bir marta keladi, bir marta kelin-kuyovlik libosini kiyib, kelin-kuyovlik vazifalarini oʻtaydi, lekin toʻy bir kunlik tantana, toʻydan keyingi hayot butun umrga tatiydigan katta yoʻl. Mana shu katta yoʻl bu hayotda bir marta yashab, oʻtish borasidagi sinov. Yigit-qizlarimiz esa oilaning asl mohiyatini bilmasdan toʻy kunida boʻladigan valsga tayyorlanayapti, toʻyini klip qilib, internet orqali oʻzini koʻz-koʻz qilishmoqda. Kechirasiz-u gʻururli, oriyatli erkak oʻz jufti-halolini butun dunyoga namoyon qilmaydi, ibo-hayoli, andishali qizlarimiz nikoh toʻyida yelkasi ochiq koʻylak kiyib, butun xalq koʻz oʻngida behayolarcha valsga tushmaydi. Axir u oʻz nomi bilan kelin, kelin esa ozgina uyatni, hayoni bilishi darkor.
Biz oriyatli xalqmiz! Har doim oʻzimizga yarashadigan ishlar qilaylik!
Qarshigʻa ALIMBOYeVA,
"Daryo boʻyi” mahallasi.
(Foto - http://albums.vsetut.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
