Amudaryo tumanida paxta yigʻim-terimi yuqori surʼatlarda olib borilmoqda (+Video)

Ayni kunlarda qishloq xoʻjaligida qizgʻin mehnat pallasi – paxta yigʻim-terimi uyushqoqlik bilan davom etmoqda. Pudratchi va hasharchilar bir yoqadan bosh chiqarib, oʻzlarining fidoyi mehnatlari bilan yuksak "oq oltin” xirmonini bunyod etishga bel bogʻlaganlar.

Amudaryo azaldan fidoyi va mehnatkash, ishning koʻzini biladigan dehqonlar yurti. Tumanimiz dehqon va fermerlari bu iboraning naqadar toʻgʻri ekanini mana necha yillardan beri davlatga gʻalla va paxta topshirish boʻyicha shartnomaviy rejalarini ortigʻi bilan bajarish orqali isbotlab kelmoqdalar.

Bugun amudaryolik fermerlar oʻzlarining halol mehnatlari bilan nafaqat tumanimiz dovrugʻini taratmoqda, balki, daromad orttirib, oʻz oilasi va ovul ahlining dasturxoni toʻkin boʻlishiga munosib hissa qoʻshmoqdalar.

Fermerning harakati-uning daromadiga bogʻliq. Hisobida mablagʻi boʻlmagan fermer nimani sotib olishi mumkin? Bir soʻz bilan aytganda, hech narsani. Demak, haqiqiy fermerning hamyoni toʻla pul boʻlishi kerak. Qolaversa, u ishchan, tashabbuskor, yangilikka oʻch, dehqonchilik sir-sinoatlarini yaxshi biladigan, uzoqni koʻra biladigan odam boʻlsagina, "Oltin fermer xoʻjaligi" maqomiga ega boʻladi. Ammo bunday baxt hammaga ham nasib etavermaydi. Buning uchun koʻproq izlanish, mehnat qilish talab qilinadi.

   Doʻrman ovuliga kiraverishdagi «Beshboyev Qurbongʻali» fermer xoʻjaligi dalalarida hayot qaynamoqda. Xoʻjalik rahbari Qurbongʻali Beshboyev 2002-yildan buyon mazkur vazifada ishlab kelmoqda. Fermer hosildorlikni oshirish ustida tinmay izlanadi. Bu borada mamlakatimiz olimlari va selektsionerlarining maslahat va koʻrsatmalari bilan cheklanib qolmasdan, 2007-yilda Misr Arab Respublikasida Oʻzbekiston Respublikasi delegatsiyasi tarkibida xizmat safarida boʻlib, dehqonchilik ishlari boʻyicha tajriba orttirib qaytdi.

Qurbongʻali aka boshchilik qilayotgan fermer xoʻjaligi dalalarini aylanar ekansiz, rafiqasi va 4 nafar farzandidan tortib ishchi-xizmatchilar va hasharchilar ham bir yoqadan bosh chiqarib, paxta yigʻim-terimi bilan band ekanligining guvohi boʻlasiz.

Ularga hormasin aytish maqsadida tuman faollari, madaniyat boʻlimi xonanda va sozandalari fermerning dalasiga tashrif buyurib, hasharchilar bilan muloqotda boʻldi. Tushlik paytida ularning madaniy hordiq chiqarishlari uchun kontsert dasturi namoyish qilindi.

Maʼlumki, 2017-yilning 9-10-avgust kunlari uyushmagan yoshlar oʻr­ta­­sida "Yoshlar — kelajak bunyodkori" shiori ostida oʻt­ka­zil­gan respublika ilmiy-amaliy konferentsiyada qat­nashgan bir guruh ishtirokchilar tomonidan, shuningdek, koʻp son­li faol va uyushmagan yoshlarning Oʻzbekiston yoshlar it­ti­foqiga qilgan murojaatlarida "Paxta — 2017" mav­su­mi­da "Fi­doyi yoshlar otryadlari"ni tuzish taklifi bil­di­rilgan edi. Bugun Respublika boʻyicha jami 575 ta ana shunday otryadlar tuzilgan. Ushbu otryadlarga jami 51138 ta uyushmagan yoshlar qamrab olingan boʻlib, bu koʻrsatgich kun sayin ortib bormoqda, yaʼni otryadga aʼzo boʻlayotgan yoshlar koʻpaymoqda. 13-sentyabr holatiga koʻra, respublika boʻyicha jami terilgan paxtaning 4700 tonnadan ortigʻi otryadlar hisobiga toʻgʻri keladi.

Ana shunday ilgʻor yoshlarni ragʻbatlantirish maqsadida Oʻzbekiston Yoshlar ittifoqi Qoraqalpogʻiston Respubilkasi Kengashi raisi tumanimizga tashrif buyurib, Yoshlar ittifoqi tuman Kengashi bilan birgalikda ilgʻor terimchi yoshlarga esdalik sovgʻalarini topshirdi. Shuningdek, muhallalardagi uyushmagan aholi vakillari, ayniqsa, oilaviy terimchilar va terimchi ayol-qizlarni ragʻbatlantirish maqsadida tuman Xotin-qizlar qoʻmitasi, "Mahalla” xayriya jamoat fondi vakillari ham dala boshiga borib, ilgʻorlarga esdalik sovgʻalarini topshirdi.

Ha, bugun dalalarimizda azmu shijoatli, fidoyi va mard dala meh­natkashlarining boy tajribasi, keskin tadbiri, jon­kuyar­ligi, yil davomida qilgan zahmatli mehnati natijasida yetish­­­tirilgan paxta xomashyosini yigʻib-terish mavsumi boshlanadi. Mamlakatimizda tashkil etiladigan bu umummilliy ha­sharda faol ishtirok etish oʻz Vatanini sevgan, oʻz yurti rav­naqi, kelajagi yoʻlida fidoyilik bilan xizmat qi­la­digan yoshlar, nafaqat yoshlar, balki har bir yurtdoshimiz uchun yaratilgan imkoniyatdir.

Barcha yurtdoshlarimizni ana shu imkoniyatlardan foydalangan holda dalaga, paxta terimiga chaqiramiz. Zero, kuzning hamjihatlikda koʻtariladigan baland xirmon iqtisodiyotimiz rivojiga munosib hissa boʻlib qoʻshiladi.