EZGU IShLAR MUQADDIMASI

Tibbiyotning aniqlashicha, odamning baxtiyor boʻlishi koʻp jihatdan uning  salomatligiga bogʻliq ekan. Chindan-da, hayotda sogʻlom, emin-erkin harakatlanib, xavotirsiz yashaganga nima yetsin!

Afsuski, oramizda dunyoga qandaydir nuqsonlar bilan kelgan, yo hayotda qandaydir sabablarga koʻra biror muchasiga ziyon yetgan, asoratli xastaliklarga duch kelgan odamlar ham uchraydi.

Dard salmogʻini dardli biladi, deganlariday, nufuzli idoralarda ishlab yurib, davr taqozosi bilan shtat qisqarishi tufayli uyida vaqtincha oʻtirib qolgan, "Boyovul” mahallasida istiqomat qiluvchi Nilufar Xolboyeva 1999-yilda onkologik kasallikka duchor boʻlib qoldi.

2003-yilda tuman rahbariyati Nogironlar jamiyati tuman boʻlimiga rahbarlik qilish vazifasini zimmasiga olishini soʻrashganida u hech ikkilanmay rozi boʻldi. Uning niyati hayotda jismoniy imkoniyati cheklangan insonlarga dalda boʻlish, ularga munosib turmush sharoitlari yaratish va ijtimoiy faol boʻlishlariga koʻmaklashish edi.

Mana, 14-yilki, u baʼzan oʻz dardini ham unutib, imkoniyati cheklangan odamlarning ham imkon qadar barcha qatori yashashi, oʻzini namoyon eta olishi uchun tinmay yelib, yuguradi.

Nilufar Xolboyeva imkoniyati cheklangan yoshlarni kompyuter savodxonligiga oʻrgatish, shuningdek imkoniyati cheklangan yigit-qizlarni kasb-hunarga, xususan, bichish-tikish, toʻqishga oʻrgatish borasida loyihalar ishlab chiqib, Oʻzbekiston Respublikasi Oliy Majlisi huzuridagi  nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi taʼsis etgan grant tanlovlarida qatnashdi va gʻolib boʻlib, loyihalarni muvaffaqiyatli amalga oshirdi.

Yaqinda jamiyat yana Fondning grant tanlovida "Boʻsh vaqtlarini samarali oʻtkazishni tashkil etish maqsadida imkoniyati cheklangan, nogiron bolalar, ayniqsa, koʻzi ojiz bolalar uchun qulay shart-sharoitlarga ega zamonaviy bolalar kutubxonasini tashkil etish” nomli loyihasi bilan qatnashib, yana gʻolib boʻldi va Parlament komissiyasi qaroriga koʻra, loyihani amalga oshirish uchun 25 mln. soʻm grant mablagʻi Nogironlar jamiyati tuman boʻlimi hisobiga oʻtkazildi.

Yaqinda tuman hokimi S.Yoʻldashev qabulida N.Xolboyevaga Oliy Majlis deputati Joldasboy Abdujamilov grant sertifikatini tantanali ravishda topshirdi.

Mazkur loyiha doirasida Nogironlar jamiyati tuman boʻlimida hali koʻplab savobli ishlar amalga oshirilishi shubhasiz.

Oygul RAJABOVA.

Suratda: Oliy Majlis deputati J.Abdijamilov N.Xolboyevaga grant sertifikatini topshirmoqda.

M.Shomurodov olgan surat.