GʻALLANI SIFATLI SAQLASh – BURChIMIZ
Gʻalla – rizq-roʻzimiz, dasturxonlarimiz koʻrki, farovonligimiz asosi.
Dehqonlarimizning fidokorona mehnati, peshona teri evaziga yetishtirilgan donni isrof qilmay, sifatli saqlash, qayta ishlash korxonalariga yetkazib berish soha mutaxassislari zimmasidagi masʼuliyatli vazifa hisoblanadi. Shu bois, gʻallakor fermerlar bilan "Taxiatosh don mahsulotlari” AJ "Mangʻit don” filiali oʻrtasida 2017-yil hosilini nest-nobud qilmay sifatli qabul qilish va saqlash boʻyicha kontraktatsiya shartnomalari tuzildi. Ushbu shartnomaga koʻra, fermer xoʻjaliklari dalalarida yetishtirilgan gʻallani sifatli qabul qilish va saqlash borasida korxonamiz tomonidan zarur shart-sharoitlar yaratib berildi va oʻrim-yigʻim mavsumining muvaffaqiyatli oʻtkazilishi taʼminlandi. Avvalo, gʻallani yongʻindan saqlash maqsadida birlamchi oʻt oʻchirish uskunalari oʻrnatilib, ochiq maydondagi quritilayotgan donni yogʻin-sochindan saqlash choralari koʻrildi. Nam oʻtkazmaydigan brezentlar tayyorlab qoʻyildi. Mavsumiy ish oʻrinlari yaratilib, 22 nafar kishining ikki smenada barakali ishlashi taʼminlandi.
Korxonamiz tomonidan qabul qilingan 5530 tonna bugʻdoy hosilini navlari hamda avlodi, sinfi, sifat koʻrsatkichlari boʻyicha alohida quritish va sifatli saqlashga eʼtibor berildi. Natijada 4830 tonna tovar-don, 703 tonna urugʻlik bugʻdoyni oʻz vaqtida va uzluksiz qabul qilishga erishildi.
Tumanimiz dalalaridan korxonamizga peshma-pesh keltirilgan har bir kilogramm gʻalla boʻyicha belgilangan preyskurant asosida hisob-kitob qilinib, xizmat koʻrsatuvchi banklarga qabul kvitantsiyalari oʻz vaqtida taqdim etildi. Yangi texnologiyalar asosida elektron tarozi oʻrnatilib, hosilni onlayn tizimida qabul qilish yoʻlga qoʻyilgani esa ishimizni ancha yengillashtirdi.
Bu yilgi hosil karvonini birinchilardan boʻlib boshlab bergan "Muhammadsoliyev Diyorbek”, "Qadamboy Poʻlat”, "Bobur-Jayxun paxtasi” kabi fermer xoʻjaliklari gʻallakorlari tumanimizning ulkan xirmoniga munosib hissa qoʻshdilar.
Shuni alohida mamnuniyat bilan qayd etamanki, mavsum davomida gʻallakor fermerlar, ijarachi dehqonlar, oʻrim-yigʻim kombaynlarining operatorlari, jamgʻarilgan gʻallani korxonamiz omboriga tashib keltiruvchi transport vositalarining haydovchilari haqiqiy fidoyilik namunalarini koʻrsatib ishladilar. Gʻallani ikki smenada, uzluksiz qabul qilishni taʼminlash maqsadida ishchi-xizmatchilar uchun zarur va qulay mehnat sharoitlarining yaratilgani ishimizda yuksak unumdorlik, sifat va samara berdi. Ishchi-xizmatchilar issiq ovqat, chanqovbosdi salqin ichimliklar bilan taʼminlandi.
Xulosa qilib aytganda, rizq-roʻzimiz, hayotimiz va dasturxonimiz koʻrki boʻlgan moʻl-koʻl gʻalla hosilidan Amu elimizning xirmonlari yanada yuksaldi. Ana shu yuksak gʻalla xirmonining bunyod etilishida "Taxiatosh don mahsulotlari” AJ "Mangʻit don” filiali korxona ishchi-xizmatchilarining ham munosib hissasi bor.
Men fursatdan foydalanib, tumanimizning mirishkor gʻallakorlarini erishilgan yuksak gʻalaba – 7030 tonnalik "qirmizi don” xirmoni bilan chin dildan muborakbod etaman:
– Gʻalla xirmonlaringiz bundan ham sarbaland boʻlsin, lafzi halol fermerlar, –deyman.
Ikrom KENJAYeV,
"Taxiatosh don mahsulotlari” AJ "Mangʻit don” filiali boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
