YaNGI VEB-SAYTLAR IShGA TUShDI

Demokratik davlat qurish hamda kuchli fuqarolik jamiyatini barpo etishda aholining axborot sohasidagi konstitutsiyaviy huquqini yanada kengroq amalga oshirish imkoniyatini yaratish, ayniqsa, davlat hokimiyati va boshqaruvi organlari faoliyatining ochiqligini va shaffofligini taʼminlash muhim ahamiyatga ega.

Shu maqsadda "Davlat hokimiyati va boshqaruvi organlari faoliyatining ochiqligi toʻgʻrisida”gi qonun qabul qilinib, mamlakatimizda bu borada keng koʻlamli ishlar amalga oshirilmoqda.

Mazkur qonun talabidan kelib chiqib, hamda foydalanuvchilarni tuman hokimligi faoliyati bilan yaqindan tanishtirish maqsadida tuman hokimligining rasmiy veb-sayti yangilangan dizaynda, yangi manzilda ishga tushirildi.

Endilikda internet foydalanuvchilari amudarya.uz veb-saytiga tashrif buyurib, tuman hokimligi faoliyati bilan yaqindan tanishishlari, maqolalar, foto- va videolavhalar orqali yangiliklardan muntazam xabardor boʻlib borishlari mumkin.

Veb-saytda normativ-huquqiy hujjatlar, hokim qarorlari va farmoyishlari, hokimlik tomonidan oʻtkazilgan va oʻtkazilishi rejalashtirilayotgan tadbir haqida maʼlumotlar berib boriladi.

"Interaktiv xizmatlar” boʻlimida esa tuman hokimligi tomonidan koʻrsatiladigan interaktiv xizmatlardan foydalanish mumkin. Ushbu boʻlimda tuman hokimining virtual qabulxonasiga havola joylashtirilgan boʻlib, foydalanuvchilar toʻgʻridan toʻgʻri tuman hokimiga elektron murojaat yoʻllashlari mumkin.

Shuningdek, xalq deputatlari tuman Kengashining rasmiy veb-sayti ham ishga tushirildi.

kengash.amudarya.uz veb-saytida tuman Kengashi, Kengashning doimiy komissiyalari hamda deputatlar faoliyati bilan tanishib borish, tuman Kengashi deputatlariga murojaat yoʻllash mumkin. Veb-saytda tuman Kengashi va doimiy komissiyalarning qarorlari joylashtiriladi, sessiyalar, doimiy komissiya majlislari, deputatlarning saylovchilar bilan uchrashuvlari va boshqa tadbirlar yoritib boriladi.

Har ikkala veb-sayt tuman hokimligining axborot xizmati vakillari tomonidan har kuni yangilab boriladi.

Ishonamizki, Xalq bilan muloqot va inson manfaatlari yilida ishga tushirilgan mazkur veb-saytlar tuman hokimligi va halq deputatlari tuman Kengashi faoliyatining ochiqligini taʼminlash orqali fuqarolarning hududiy davlat hamda vakillik organi bilan oʻzaro aloqalarini yanada mustahkamlashga xizmat qiluvchi koʻprik vazifasini oʻtaydi.

Tuman hokimligining axborot xizmati.