Eng faol komissiya aniqlandi

"Fuqarolarning oʻzini oʻzi boshqarish organlari faoliyatini muvofiqlashtirish” boʻyicha tuman Kengashining 2016-yil 18-yanvardagi 1-sonli yigʻilish bayoni bilan tasdiqlangan ish rejasi ijrosini taʼminlash maqsadida Mahalla” xayriya jamoat fondi tuman boʻlinmasi boshqaruvi, Ichki ishlar boʻlimi, tuman Tibbiyot birlashmasi, xalq taʼlimi muassasalari faoliyatini metodik taʼminlash va tashkil etish boʻlimi, madaniyat va sport ishlari boʻlimi, "Kamolot” yoshlar ijtimoiy harakati tuman kengashi bilan hamkorlikda "Fuqarolar yigʻinlarining eng namunali voyaga yetmaganlar, yoshlar va sport masalalari boʻyicha komissiyasi” tanlovi tashkil etildi.

"Fuqarolar yigʻinining voyaga yetmaganlar,  yoshlar va sport masalalari boʻyicha komissiyasi toʻgʻrisida”gi Nizomda belgilangan vazifalar ijrosini joylarda toʻlaqonli ijrosini taʼminlash, fuqarolar yigʻinlarida samarali faoliyat koʻrsatib kelayotgan voyaga yetmaganlar, yoshlar va sport masalalari boʻyicha komissiyalarni ijobiy ish tajribalarini keng ommalashtirish, voyaga yetmaganlar va yoshlarning maʼnaviy-maʼrifiy yetuk boʻlib voyaga yetishlarini, ommaviy ravishda sport bilan shugʻullanishlarini, ularning huquqlari, erkinliklari va qonuniy manfaatlarini taʼminlash, ular oʻrtasida nazoratsizlik va huquqbuzarliklarning profilaktikasini amalga oshirish ishlarini jadallashtirish tanlovning asosiy maqsadi hisoblanadi.

Yuqoridagi Nizom asosida joriy yilning 3-5 – oktyabr kunlari tanlovning saralash bosqichi oʻtkazildi. Tumanning 47 ta fuqarolar yigʻinlaridagi voyaga yetmaganlar, yoshlar va sport masalalari boʻyicha komissiyalari 2 ta shart  asosida bellashib, 5 nafar hayʼat aʼzolari tomonidan 25 ballik tizimda baholandi. 20-oktyabr kuni esa tanlovning tuman bosqichi Amudaryo qishloq xoʻjalik kasb hunar kolleji binosida boʻlib oʻtdi. Saralash bosqichida gʻoliblikni qoʻlga kiritgan 11 nafar komissiya raislari 2 ta shart asosida oʻzaro bellashdilar.

1-shartda voyaga yetmaganlar, yoshlar va sport masalalari boʻyicha komissiyalar raislari 5 daqiqa ichida fuqarolar yigʻini hududida voyaga yetmaganlar va yoshlarning maʼnaviy-maʼrifiy yetuk boʻlib voyaga yetishlari, ommaviy ravishda sport bilan shugʻullanishlari, ularning huquqlari, erkinliklari va qonuniy manfaatlarini taʼminlash, ular oʻrtasida nazoratsizlik va huquqbuzarliklarning profilaktikasini amalga oshirish borasida amalga oshirilayotgan keng qamrovli ishlar taqdimotini slaydlar asosida, shuningdek, ijodiy yondoshgan holda namoyish etdilar. 2-shartda esa ishtirokchilarning bilim saviyasi, dunyoqarashi, fikrlash qobiliyati, mulohaza yuritishini, shuningdek, sohaga oid qonun hujjatlarini qay darajada bilishlarini baholash maqsadida har bir komissiya raisi uchun 2 tadan savol berildi.

Tanlov murosasiz bahslarga boy boʻldi. Biri biridan bilimdon Arna boʻyi, Ayoqchi, Boy ovul, Xizir eli, Chordara mahalla hamda Qilichboy, Oʻrta qalʼa, Choykoʻl, Toʻlqin, Kuyuk koʻpir, Oq oltin ovul fuqarolar yigʻinlari voyaga yetmaganlar, yoshlar va sport masalalalari boʻyicha komissiya raislaridan hakamlar hayʼati xulosasiga koʻra eng koʻp ball olgan 7 nafar ishtirokchilar 1-, 2- va 3-oʻrinlarga  loyiq deb topildi.

Tanlovning tuman bosqichida 61 ball toʻplagan "Qilichboy” ovul fuqarolar yigʻinining "Voyaga yetmaganlar, yoshlar va sport masalalari boʻyicha komissiyasi” birinchi oʻringa, 54 ball toʻplagan "Arna boʻyi” mahalla fuqarolar yigʻinining "Voyaga yetmaganlar, yoshlar va sport masalalari boʻyicha komissiyasi” ikkinchi oʻringa, 49 ball toʻplagan "Chordara” mahalla fuqarolar yigʻinining "Voyaga yetmaganlar, yoshlar va sport masalalari boʻyicha komissiyasi” uchinchi oʻringa munosib deb topildi va "Mahalla” xayriya jamoat fondi hamda hamkor tashkilotlarning diplom va esdalik sovgʻalari bilan taqdirlandi.