SOGʻLOM AVLODGINA YuRT KELAJAGINI YaRATIShGA QODIR

Oʻzbekiston dunyo mamlakatlari orasida xotin-qizlar uchun qulay sharoitlar yaratish, onalik va bolalikni muhofaza qilish borasida yetakchi oʻrinlardan birida turadi.

Mustaqillik yillarida davlatimiz tomonidan xotin-qizlarning maʼnaviy-maʼrifiy, ijtimoiy-iqtisodiy, siyosiy islohotlarda faol ishtirok etishi uchun keng imkoniyatlar yaratilmoqda. Natijada xotin-qizlarning kuchli  fuqarolik jamiyatiga oʻtish sharoitida davlat va jamiyat qurilishidagi oʻrni va roli tobora oshib bormoqda. Chunki xotin-qizlar ham erkaklar bilan  bir qatorda jamiyat hayotini rivojlantirishda faol ishtirok etish imkoniyati va qobiliyatiga egadirlar. Qolaversa, jamiyatning kichik bir boʻlagi boʻlgan oila mustahkamligiga erishishda, maʼnaviy-axloqiy qadriyatlarimizning barqaror boʻlishida ham ayollarning oʻrni beqiyosdir.

Oʻzbekistonning istiqlol yillarida qoʻlga kiritgan salmoqli yutuqlarining eng muhimi onalar va bolalar sogʻligi muhofazasiga katta eʼtibor qaratilganligi va yaxshi natijalarga erishilayotganidir. Davlatimiz va muhtaram Yurtboshimiz tomonidan ushbu yoʻnalishda qabul qilinayotgan qator qarorlar va dasturlar bunga asos boʻlmoqda.

Oʻzbekiston Respublikasi Prezidentining 2014-yil 1 avgustdagi "2014-2018-yillarda Oʻzbekistonda aholining reproduktiv salomatligini yanada mustahkamlash, onalar, bolalar va oʻsmirlar sogʻligini muhofaza qilish borasidagi Davlat dasturi toʻgʻrisida”gi 2221-sonli qarori ham aynan shu maqsadlarga qaratilgandir.

Tuman tibbiyot birlashmasida ham bu borada koʻpgina ibratli ishlar amalga oshirilmoqda.

Ayni kunda tumanimiz aholisi 184 999 nafardan oshib, ketdi. Shularning  51 339 nafari tugʻish yoshidagi ayollardir. Ular orasida sogʻlom turmush tarzini targʻib qilish, oʻzining va farzandlarining sogʻligi uchun javobgarlik hissini tarbiyalash, sogʻlom farzandlarni dunyoga keltirishi borasida olib borayotgan targʻibot-tashviqot ishlarimiz oʻzining ijobiy samaralarini berayotir. Natijada ayollar kutilmagan homiladorlikdan oʻzlari ongli ravishda saqlanib, farzand koʻrishni oila aʼzolari bilan maslahatlashib, sogʻligini mustahkamlagan holda rejalashtirmoqdalar.

Shuningdek, tugʻish yoshidagi ayollarning sogʻligini nazorat qilib borishga ham eʼtibor berilayotir.

Tumanimizda 2016-yilning  oʻtgan 7 oyi davomida 49567 nafar tugʻish yoshidagi ayollar tibbiy tekshiruvlardan oʻtkazildi va homiladorlikka moneligi aniqlangan ayollar davolanib, sogʻlomlashtirildi.

Oʻzbekiston Respublikasi Vazirlar Mahkamasining 2010 yil 22-iyuldagi 156-sonli "Respublikaning qishloq tumanlarida onalar va bolalarning reproduktiv salomatligini mustahkamlashga doir qoʻshimcha chora-tadbirlar toʻgʻrisida”gi qaroriga muvofiq, 2011-yilning aprel oyidan boshlab homilador ayollarga polivitamin kompleksi  bepul berilmoqda, uning ahamiyati keng tushuntirilmoqda. Natijada joriy yilimizning oʻtgan 7 oyi davomida tuqqan 2017 nafar ayollarimiz ushbu jarayonni meʼyorida oʻtkazdilar.

Onalar va bolalar salomatligiga erishishda nikohgacha tibbiy koʻrikning  joriy etilgani ham mustahkam asos boʻlib xizmat qilmoqda.

Davlatimiz, Prezidentimiz tomonidan qabul qilinayotgan yangi ijtimoiy dasturlar va qarorlarda ayollar va bolalar sogʻligini saqlashga qaratilgan vazifalar ustuvor ekanligi bilan ahamiyatlidir. Bularning zamirida farzandlarning sogʻlom dunyoga kelishi va sogʻlom oʻsib-ulgʻayib, kamolga yetishidek ezgu niyatlar mujassamdir. Chunki  sogʻlom avlodgina yurt kelajagini yaratishga qodir boʻladi.

Muhabbat YuSUPOVA, 

tuman tibbiyot birlashmasining bosh akusher-ginekologi.