MAQSAD VA HARAKAT KOMILLIKKA ELTADI

Mustahkam salomatlikka faqatgina maqsad va harakat orqali erishish mumkin. Shunday ekan, bugungi kunda farzandlarimizning komil,  barkamol, sogʻlom inson boʻlib oʻsishi uchun qilayotgan harakatlarimiz eng katta yutugʻimizga asos boʻladi.

Tabobat ilmining bilimdoni Abu Ali ibn Sino bobomiz asarlarining birida bolalardagi harakatchanlik tabiatan zarur ehtiyoj ekanligini taʼkidlab shunday degan: "Har qanday yoshning oʻz qonuniyatlari bor, bolalik qonuni bu oʻyin, demak, bolalarimizga nisbatan diqqat va eʼtiborli boʻlishimiz lozim”. Bu fikrlardan kelib chiqib shuni aytishimiz joizki, tinib-tinchimas bolalarimiz turli xususiyatlarga ega boʻla turib, harakat qilishga ehtiyoji boʻlgani uchun uni qonuniyatga koʻra bajarishi shart ekan. Masalan, bola bir kunlik oʻzi uchun etarli boʻladigan harakatni bajara olmasa, u tinib-tinchimas ekan, faqat harakat faoliyatini maʼlum darajada bajargandagina uxlab dam olishi mumkin ekan. Bu holat faqat yosh kichkintoylargagina emas, balki barcha yoshdagi bolalar uchun ham xosdir. Shuning uchun ularning jismoniy tarbiya darsini harakatli oʻyinlar shaklida tashkillashtirish dolzarb va oʻta muhim masala hisoblanib kelinmoqda. Shunday ekan, men ham oʻquvchilarimning faolligidan, harakatchanligidan zavqlanib, har oyda musobaqalar oʻtkazib turaman.

Shu yilning mart oyida maktabimizda "Quvnoq startlar” sport musobaqasi oʻtkazdim. Men oʻquvchilarimning zavq va shavq ila musobaqalarda qatnashib, hamjihatlikda bir-birlari bilan maslahatlashib, bir-biriga yordam berib ish yuritishayotganliklarini koʻrib, koʻzim quvondi. Maqsadimiz ham ularning harakat faolligini oshirish bilan birgalikda maʼnaviy-ruhiy his-tuygʻularini tarbiyalashdir. Musobaqa jarayonida oʻquvchilarning koʻtarinki ruhda qatnashib, har bir oʻquvchining gʻolib chiqish uchun harakat qilishi men uchun quvonarli holat edi. "Quvnoq startlar” sport musobaqasining oʻtkazilishining yana bir samarali jihatlaridan biri shundaki, oʻyin chogʻida sinfdoshlar bir-birlarini yanada yaxshi bilib oladilar, sabr-qanoatli boʻlishga, oʻzaro bir-birini qoʻllab-quvvatlashga oʻrganadilar, ogʻir ahvolga tushganda qutqarish, yordam berish hissini tuyadilar.

Musobaqada qatnashish, gʻolib chiqish yoki magʻlub boʻlish emas, balki bir-biri bilan doʻstlashib, bir-biriga quvonch bagʻishlash, bundan-da katta yutuqlarga erishishga imkoniyatlar yaratishdir. Bu farzandlarimiz kamolotida muhim oʻrin tutadi.