BOLAJONLAR UChUN BAYRAM TADBIRLARI

Farzandlarimizning har tomonlama sogʻlom boʻlib oʻsishida jismoniy tarbiyaning oʻrni gʻoyat katta. Shu sababli 1-iyun – xalqaro bolalarni himoya qilish kuni munosabati bilan bolalar va oʻsmirlar ishtirokida qator sport musobaqalari tashkil qilindi.

Yoshlar oʻrtasida sportning ommaviyligiga erishish, oʻsib kelayotgan yoshlarni jismonan sogʻlom va maʼnan barkamol qilib tarbiyalash borasida mahalla bolalari va oʻsmirlari oʻrtasida 3 bosqichda "Futbolimiz kelajagi” musobaqalari tashkil etildi. 1-bosqich 25-aprel – 5 may kunlari mahallalarda, mahalla yoshlari va oʻsmirlari oʻrtasida oʻtkazilib, unga 5 500 nafardan ortiq yosh futbolchilar qatnashdi. 10-15-may kunlari mahallalarning gʻolib jamoalari ishtirokida 6 ta hududda oʻtkazilgan tuman hududiy bosqich musobaqalarida jami 141 jamoa tarkibida 1880 nafardan ortiq yoshlar qatnashdilar. Hududlarda gʻolib boʻlgan mahallalar jamoalari esa 24-may kuni tuman final bosqichida ishtirok etishdi. 18 ta jamoa va 252 nafar bolalar hamda oʻsmirlar ishtirokidagi qizgʻin bellashuvlar yakuniga koʻra, 9-10 yoshli futbolchilar oʻrtasida Xolimbeg ovuli jamoasi birinchi, Oybek nomli mahalla jamoasi ikkinchi va Kuyuk koʻpir ovuli jamoasi uchinchi oʻrinni egalladilar. 11-12 yoshli futbolchilar oʻrtasida esa Oq oltin ovuli jamoasi birinchi, Toʻlqin ovuli jamoasi ikkinchi va Qizilcholi mahallasi jamoasi uchinchi oʻrinni egalladi. 13-14 yoshli futbolchilar oʻrtasida Beruniy nomli mahalla yoshlaridan iborat jamoaga teng keladigani topilmadi. Oʻrta qalʼa va Qilichboy ovullari jamoalari esa tegishli ravishda 2- va 3-oʻrinlarga egalik qilishdi.

Gʻoliblarga "Mahalla” xayriya jamoat fondi tuman boʻlinmasi tomonidan qimmatbaho sovgʻalar va diplomlar topshirilib, eng kuchli jamoalar musobaqalarning navbatdagi – tumanlararo hududiy bosqichiga yoʻllanma oldilar.

Joriy yilning 26-mayidan Xalqaro bolalarni himoya qilish kuni munosabati bilan tumanimizda haftalik oʻtkazildi. Haftalik davomida ovul va mahallalarda "Har bir bolaga mehr, eʼtibor!” shiori ostida "Bolalarimiz kulgusi dunyoni toʻldirsin!” mavzusida qator tadbirlar uyushtirildi.

Haftalik tadbirlariga tumanimizdagi bolalar bogʻchalari tarbiyalanuvchilari, ijtimoiy himoyaga muhtoj oilalar farzandlari keng jalb etildi. Shuningdek, mahallalarda, maktabgacha taʼlim muassasalarida, umumtaʼlim maktablarida maʼnaviy-maʼrifiy mavzularda kontsertlar, tomoshalar hamda turli sport musobaqalari oʻtkazildi. Nogiron bolalar oʻrtasida "Rang-barang boʻyoqlar dunyosi” mavzusida rasm chizish boʻyicha oʻtkazilgan tanlov ham shular jumlasidandir.

26-may kuni Olmazor mahallasida, hamda Qilichboy ovuli hududida, 27-may kuni Qipchoq ovuli hududida, 28-may kuni esa Xitoy ovuli va Jumurtov shaharchasi hududlarida yashovchi bolalar uchun bayram tadbirlari tashkil qilindi.

Tadbirlar doirasida  qator uchrashuvlar, kontsert dasturlari, sport musobaqalari oʻtkazildi va bolalar muzey hamda dam olish joylariga, istirohat bogʻiga olib borildi. Har bir fuqarolar yigʻinidan 15 nafardan oila farzandlari ishtirokida "Bir bolaga yetti mahalla ota-ona” shiori ostida tumanning diqqatga sazovor joylari va madaniyat maskanlariga sayohat uyushtirildi.

Fond tomonidan kam taʼminlangan, boquvchisini yoʻqotgan oila farzaandlari va nogiron bolalarning 188 nafariga 3 mln. 158 ming soʻmlik sovgʻalar berildi.

Bundan tashqari, tumanimizda 3 nafar egizak farzandlari boʻlgan Xitoy, Toʻlqin va Kuyuk koʻpir ovullarida yashovchi 3 nafar onalarning farzandlariga bayram munosabati bilan fond tomonidan sovgʻalar berildi.

Shuningdek, 31-may kuni mahallalarda yashovchi 5 yoshdan 16 yoshgacha boʻlgan maktab oʻquvchilari oʻrtasida shaxmat musobaqalari oʻtkazildi. Musobaqalarda 64 nafar voyaga yetmagan oʻgʻil va qizlar ishtirok etib, ular fond tomonidan esdalik sovgʻalari va faxriy yorliqlar bilan taqdirlandilar.

Bir soʻz bilan aytganda, bayram arafasida tumanimizning barcha hududlarida yashovchi bolajonlar turli madaniy-koʻngilochar va sport tadbirlarida qatnashib, olam-olam taassurotlar oldilar.

Rustam ROʻZMETOV,

"Mahalla” xayriya jamoat fondi tuman boʻlinmasi raisi.