AYoLGA EʼTIBOR - KELAJAKKA EʼTIBOR

Mamlakatimizda istiqlol yillarida barcha jabhalarda amalga oshirilgan ulkan bunyodkorlik ishlarida, yangilanishlarda xalqimizning ertagi kunga ishonch bilan qarashi, ijtimoiy faolligi, yurt istiqboli, tinch-osoyishtaligi uchun daxldorlik hissi bilan yashab mehnat qilayotganliklari mustahkam asos boʻlib xizmat qilmoqda.

Ayniqsa, mustaqilligimizning ilk yillaridan boshlab amaliyotga tatbiq etilgan "Sogʻlom oila – sogʻlom avlod – sogʻlom kelajak” gʻoyasi oilalarda sogʻlom turmush tarzining kamol topishiga zamin yaratdi.

Muhtaram Yurtboshimizning mamlakatimizning kelajagi boʻlmish yosh avlod tarbiyasini avvalo oilalarda sogʻlom turmush tarzini shakllantirish, tibbiy madaniyatni yuksaltirish, ayollar uchun munosib turmush sharoitini yaratishdan boshlash lozimligi haqidagi yoʻl-yoʻriqlari asosida "Sogʻlom ona-sogʻlom bola” maqsadli vazifasini amalga oshirish maqsadida keng targʻibot-tashviqot ishlari olib borilganigi, oʻsib kelayotgan yosh avlod haqidagi gʻamxoʻrlik davlatimiz qonunchiligida ham oʻz ifodasini topayotgani bugun hayotimizda oʻzining ijobiy samaralarini bermoqda. Oʻzbekiston Respublikasi Prezidentining 2004-yil 25-maykungi "Oʻzbekiston Xotin-qizlar qoʻmitasi faoliyatini qoʻllab-quvvatlash borasidagi qoʻshimcha chora-tadbirlar toʻgʻrisida”gi Farmoni, 2014-yil 1-avgustdagi"2014 — 2018-yillarda Oʻzbekistonda aholining reproduktiv salomatligini yanada mustahkamlash, onalar, bolalar va oʻsmirlar sogʻligʻini muhofaza qilish borasidagi Davlat dasturi toʻgʻrisida”gi qarori va Oʻzbekiston Respublikasi Vazirlar Mahkamasining 2010-yil 22-iyuldagi 156-sonli "Respublikaning qishloq  tumanlarida onalar va bolalarning reproduktiv salomatligini mustahkamlashga doir qoʻshimcha chora-tadbirlar toʻgʻrisida”gi qarorida ham oilalar farovonligini taʼminlash, ularda ijobiy psixologik iqlimning hukm surishi, onalar va bolalar salomatligini saqlash, oilaning mustahkamligiga erishish, unda ham jismonan, ham maʼnan yetuk farzandlarning kamol topishiga erishish kabi ulugʻvor maqsadlar mujassamdir.

Mamlakatimiz dunyoda xotin-qizlar uchun qulay sharoitlar yaratish, onalik va bolalikni muhofaza qilish borasida yetakchi oʻrinlardan birini egallaydi. 2010yilda YuNISEFning sharqiy Yevropa, Boltiqboʻyi va Mustaqil Davlatlar Hamdoʻstligi mamlakatlari boʻyicha ofisi tomonidan onalik va bolalikni muhofaza qilish borasidagi dasturlarni joriy qilishda Oʻzbekistonning mintaqadagi namunaviy  model sifatida eʼtirof etilgani ham bejiz emas.

Muhtaram Yurtboshimiz tomonidan 2010-yilning  "Barkamol avlod yili”, 2014-yilning "Sogʻlom bola yili”, deya nomlanishiga muvofiq qabul qilingan Dalvat Dasturlari ijrosi bu boradagi ishlarni yana yangi bosqichga koʻtardi.

Bugungi kunda butun mamlakatimizda boʻlgani kabi tumanimizda ham yosh avlodning sogʻlom dunyoga  kelishi,emin-erkin ulgʻayishi va yetuk insonlar boʻlib voyaga yetishlari uchun barcha shart-sharoitlar muhayyo. Maktablarimizda bolalarning fan asoslarini chuqur egallashlari uchun darsdan tashqari turli  fan toʻgaraklari, sport toʻgaraklari faoliyat yuritmoqda. Oʻquvchilarning bilimlarini,turli kasb-hunarlarga qiziqishlarini rivojlantirishga koʻmaklashish va ragʻbatlantirish maqsadida turli musobaqalar, koʻrik-tanlovlar oʻtkazilmoqda.

Ularning yurtimizga munosib oʻgʻil-qizlar boʻlib voyaga yetishlariga ulkan eʼtibor qaratilmoqda. Ular orasida sport musobaqalari, koʻrik-tanlovlarning Qoraqalpogʻiston Respublikasi, Oʻzbekiston bosqichlari gʻoliblari safi tobora kengayib borayotgani bu boradagi ishlarimizning ijobiy samaralaridir.

 Tugallangan 2015-yilda ham oila,deya atalmish muqaddas qoʻrgʻonning bekalari boʻlmish ayolga - onaga yuksak ehtirom koʻrsatish, uning ogʻirini yengil qilish, munosib turmush sharoitlarini yaratish, oila,onalik va bolalikni muhofaza qilish borasida tumanimizda koʻpgina xayrli ishlar amalga oshirildi. Oʻtgan ikki yil davomida onalar oʻlimi qayd etilmaganining oʻzi bu boradagi saʼy-harakatlar samarali boʻlganligini koʻrsatib turibdi. Oʻtgan yili4178 nafar sogʻlom chaqaloqlar dunyoga keldi va ularning meʼyorida oʻsib rivojlanishini tibbiyot xodimlari muntazam nazorat qilib borishmoqda.

Xotin-qizlar bilan ishlashish, ularning ijtimoiy himoyasini taʼminlash, mehnatini muhofaza qilish, tadbirkorlikka yoʻnaltirish, kredit olishlariga koʻmaklashish, yangi ish oʻrinlari yaratish boʻyicha reja asosida ish olib borildi.

Maʼlumki mamlakatimiz iqtisodiyotida tadbirkorlik salmoqli oʻrin tutadi. Ayni kunda ish bilan band boʻlmagan ayol-qizlarni mazkur sohaga jalb qilish, faoliyatini rivojlantirishga koʻmaklashishga alohida eʼtibor qaratilmoqda. 2015-yilning oʻzida tumanimiz boʻyicha 200 nafarga yaqin xotin-qizlarga tadbirkorlik faoliyatini rivojlantirish, shuningdek, isteʼmol ehtiyojlari va taʼlim maqsadi uchun jami 1 mlrd. soʻmdan ortiq miqdorda kreditlar berildi. "Amudaryo tumanida 2015-yilda xotin-qizlar uchun yangi ish oʻrinlari tashkil etish va bandligini taʼminlash manzilli dasturi”ga asosan ayol-qizlar uchun 1704 ta yangi ish oʻrni yaratilishi rejalashtirilgan edi. Amalda esa 1741 yangi ish oʻrni yaratildi.

Tuman xotin-qizlar qoʻmitasi oʻz faoliyatini boshlangʻich tashkilotlar bilan uzviy aloqada va hamkorlikda olib boradi. Boshlangʻich tashkilotlar bizning tuman xotin-qizlari hayotiga chuqur kirib borishimizda, ularni ezgu maqsadlar yoʻlida birlashtirishda, ayol-qizlar bilan ishlashishda eng ishonchli suyanchimiz, tayanchimizdir. Mangʻit shahridagi 3-sonli maktabgacha taʼlim muassasasi tarbiyachisi Sayyora Matkarimova "Xotin-qizlar qoʻmitasining eng namunali boshlangʻich tashkiloti” koʻrik-tanlovining mamlakat bosqichi gʻolibi boʻlganligi butun tumanimiz xotin-qizlarini quvontiradi, yanada faollikka undaydi.

Shuningdek, 2015yil yakunlariga koʻra, Qoraqalpogʻiston Respublikasi ichki ishlar vazirligi tomonidan tuman xotin-qizlar qoʻmitasi "Eng faol xotin-qizlar qoʻmitasi”, deya eʼtirof etildi va diplom, qimmatbaho sovgʻalar bilan taqdirlandi. Albatta,erishilgan  natijalar bilan cheklanib qolmay, yanada yangi marralar, muvaffaqiyatlar sari intilaveramiz.

 Joriy yilning "Sogʻlom ona va bola yili”, deya nomlanishi faoliyatimizni yanada jonlantirishimiz lozimligini taqozo etadi. Shunga muvofiq, tuman xotin-qizlar qoʻmitasi tashabbusi bilan "Tumanda onalik va bolalikni muhofaza qilish, xotin-qizlar va voyaga yetmaganlar bilan ishlashish boʻyicha 2015-yilda amalga oshirilgan ishlar, 2016 "Sogʻlom ona va bola” yilida amalga oshirilishi lozim boʻlgan vazifalar”ga bagʻishlangan kengaytirilgan yigʻilish oʻtkazildi. Yigʻilishda ishtirok etgan huquqni muhofaza etuvchi organlar, tibbiyot birlashmasi, XTMFMTTE boʻlimi masʼul xodimlari, ovul, mahallalar oqsoqollari va maslahatchilari, kasb-hunar taʼlimi muassasalari va mavjud maktablar maʼnaviyat va maʼrifat ishlari boʻyicha direktor oʻrinbosarlari, jamoat tashkilotlari rahbarlari bilan birgalikda 2015-yilda yoʻl qoʻyilgan kamchiliklar ham keng muhokama etildi va 2016-yildagi vazifalar belgilab olindi. Joriy yilda ham tumanimizda onalik va bolalikni muhofaza qilish, xotin-qizlarni ijtimoiy-huquqiy qoʻllab-quvvatlash, ularning kasbiy, maʼnaviy, intellektual salohiyatini va siyosiy faolligini oshirish, pirovardida turmushining farovon, goʻzal va sermazmun boʻlishiga erishish bosh maqsadimizdir. Chunki ayol – kelajak egalarini kamolga yetkazuvchi, har qancha  hurmat va ehtiromga munosib zot.

Koʻklam ila hamqadam keladigan 8-mart - Xalqaro xotin-qizlar kuni muhtarama va mukarrama ayol-qizlarimiz uchun haqiqiy bayramdir.

Men barchangizni shu qutlugʻ kun bilan tabriklab, uzoq umr, tani sogʻlik va baxt-iqbol tilab qolaman!

Maryam AHMEDOVA, tuman hokimi oʻrinbosari, Xotin-qizlar qoʻmitasi raisi, Qoraqalpogʻiston Respublikasi Joʻqorgʻi Kengesi deputati.

(Foto - uza.uz)