YeRGA EGALIK HISSI YuTUQLARIMIZGA ZAMIN BOʻLMOQDA
Mustaqillik yillarida mamlakatimiz qishloq xoʻjaligiga joriy etilgan islohotlar tufayli dehqon yerning haqiqiy xoʻjayiniga aylandi. Bugun u oʻzi yetishtirgan hosilning daromadidan manfaatdor. Yerga egalik hissi qishloq xoʻjalik ekinlarining barchasidan ham yuqori hosil olib, xoʻjaligi, oilasi iqtisodini mustahkamlashga asos boʻlmoqda.
Men yoshligimdan paxtachilik tashvishlariga guvoh boʻlib ulgʻaydim. Keyinchalik brigada boshligʻi boʻlib ishladim. U paytlarda brigadirlar fa-qatgina dala mehnatkashlariga buyurilgan topshiriqlarni bajartiruvchi edi, xolos. Bugun-chi, bugun? Bugun oʻz yerimiz oʻz ixtiyorimizda, fermer nafaqat yer uchun, balki, hududida istiqomat qiluvchi aholining turmush sifatini yaxshilashga, farovon yashashiga ham masʼul. Yangi-yangi ish oʻrinlari yaratib, aholining ish bilan taʼminlanishiga ham hissa qoʻshmogʻi darkor.
Men 2002-yilda "Iskandarov Farhod” fermer xoʻjaligini tuzgan vaqtimdan beri 13-yil oʻtgan boʻlsa, hozirgi kungacha xoʻjaligimiz tumanimizdagi eng iqtisodiy baquvvat va moʻl hosilli xoʻjalikka aylandi. Birgina oʻtgan yilning oʻzida 105 gektar paxta maydonlaridan 216 tonna hosil yetishtirish boʻyicha shartnoma tuzgan boʻlsak, amalda 378 tonna paxtani davlatimiz xirmoniga toʻkdik. Natijada 89 nafar ijarachilarimizning ham daromadi moʻl boʻldi, xoʻjaligimizga yangi texnikalar xarid qilish imkoniyatiga ega boʻldik.
Joriy yilda ham xoʻjaligimizda pilla, bugʻdoy yetishtirish rejalari ortigʻi bilan bajarildi. Hozir asosiy ekinimiz – paxta yigʻim-terimiga kirishdik. Qiygʻos ochilib turgan paxtalar bu yilgi xirmonimiz ham moʻl boʻlishidan darak berib turibdi. Asosiy dalalarimizga "Buxoro-8”navini ekkanmiz. Bu hosildor nav boʻlishi bilan birga tumanimizda ekilayotgan boshqa navlarga nisbatan hafta – oʻn kun kechroq yetiladi. Biroq biz avgust oyida ham gʻoʻza tarbiyasini davom ettirib, hosilga-hosil qoʻshishga erishdik.
Qishloq xoʻjaligi xodimlari uchun juda masʼuliyatli va hayajonli damlar – yigʻim-terim mavsumi boshlanib ketdi. Yil boshidan beri qishning ayozi-yu yozning issiq taftini pisand etmay, dalada qilgan mehnatlari mahsuli taroziga qoʻyiladigan damlarga oz fursat qolayapti. Peshona teri, qalb qoʻri bilan asosiy boyligimiz – paxtadan yuqori hosil yetishtirishdek ulugʻ maqsadlar yoʻlida mehnat qilgan barcha paxtakorlarning mehnatlari samarali, yuzlari yorugʻ boʻlishini tilayman. Bizga ana shunday imkoniyatlarni bergan mustaqilligimizning 24 yilligi qutlugʻ boʻlsin, deyman.
Farhod ISKANDAROV, fermer.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
