“SALOM, JONAJON MAKTAB, SENI SOGʻINDIK!”

Istiqlol yillarida mamlakatimizning barcha hududlarida ham zamonaviy andozalarda qad rostlagan muhtasham umumtaʼlim maktablari, oʻrta maxsus, kasb-hunar taʼlimi maskanlari yuqori surʼatlarda rivojlanib borayotgan yurtimizning koʻrkiga koʻrk qoʻshmoqda. Ularda ertagi kunimizning egalari qunt bilim olishlari uchun yaratilgan sharoitlar bugun butun dunyo havas bilan qaragulik darajaga yetdi. Agar buni tumanimiz misolida olib qaraydigan boʻlsak, boshlanayotgan yangi 2015-2016 oʻquv yilida faoliyat koʻrsatadigan 76 ta umumtaʼlim maktablari, 3 ta Bolalar va oʻsmirlar sport maktablari, 2 ta Bolalar musiqa va sanʼat maktablari, 8 ta kasb-hunar kollejlari va 3-sonli Amudaryo akademik litseyining ayrimlari mustaqillik yillarida qurilib foydalanishga topshirilgan boʻlsa, avval mavjudlari ham qayta rekonstruktsiya qilinib, zamonaviy qiyofa kasb etdi va farzandlarimizning davr talablariga mos taʼlim olishlari, kasb-hunar egallab mustaqil hayotga barkamol insonlar boʻlib kirib borishiga sharoitlar yaratildi.

Shu boisdan ham yozgi taʼtildan soʻng, yangi oʻquv yilining boshlanishi barcha oʻquvchilar uchun quvonchli kun hisoblanadi.

2-sentyabr kuni ertalab tumanimizning 76 ta maktablarida 30 000 dan ziyod oʻgʻil-qizlar yangi oʻquv yilining boshlanishiga bagʻishlangan Birinchi qoʻngʻiroq tantanasiga yigʻildilar. Yoz boʻyi jimjitlik hukmronlik qilgan taʼlim maskanlari yana bolajonlar bilan gavjum boʻldi. Maroqli dam olib, bir-birini, ustozlarini sogʻingan, jonajon maktabi quchogʻiga talpingan oʻquvchilarning shodligining cheki yoʻq. Ular uchun orziqib kutilgan birinchi qoʻngʻiroq tantanasi shuning uchun ham hayajon, taassurotlarga boy boʻldi. 3870 nafardan ziyod bolajonlar esa ilk bora maktab ostonasiga qadam qoʻyib, 1-sinflarda oʻqishni boshladilar. Ularga 12 turdagi oʻquv qurollari jamlanmasi solingan papkalarning taqdim etilishi mamlakatimizda yosh avlodga koʻrsatilayotgan cheksiz gʻamxoʻrlikning bir namunasidir.

Mamlakatimiz Prezidenti muhtaram I.Karimov qaroriga binoan 1998-yildan beri 1-sinf oʻquvchilariga davlat tomonidan oʻquv qurollarining bepul berilishi bolajonlarning oʻquvchilik hayotida oʻchmas iz qoldirayotgani shubhasiz.

Birinchi qoʻngʻiroq jaranglab, barcha oʻquvchilarni oʻzlarining tahsil oladigan sinfxonalariga chorladi. Ular shodu xurramlik bilan "Salom, jonajon maktab, seni sogʻindik” deya yangi oʻquv yilini ilk saboq –mustaqillik darsi bilan boshladilar.

Ikki yil muqaddam yangidan qurilib, foydalanishga topshirilgan 76-sonli umumtaʼlim maktabida ham yangi oʻquv yili koʻtarinki ruhda boshlanib ketdi. Shu munosabat bilan oʻtkazilgan tantanaga maktab oʻquvchilari, oʻquvchilarning ota-onalari qatnashdilar.

Maktab direktori Nurbek Yoʻldoshev, ota-onalar oʻquvchilarni yangi oʻquv yilining boshlanishi bilan qutladilar.

Shubhasiz, koʻngillarida bir olam hayajon bilan ilk saboqni boshlagan tumanimizning 30 mingdan ziyod oʻquvchilari uchun boshlanayotgan yangi oʻquv yili ilm choʻqqilari sari dadil odimlashida muhim pillapoya boʻlib qoladi.

Oygul RAJABOVA.