KEKSALARNI EʼZOZLASh - EZGU FAZILAT

Keksalarni eʼzozlashdek muqaddas qadriyat xalqimizni jipslashtirish, odamlar orasida mehr-oqibat va hamjihatlikni mustahkamlash, turli millat vakillarining ahil-inoq yashashiga xizmat qilib kelgan. Kattalarga hurmat, kichiklarga izzat koʻrsatish ulugʻlangani bois, jahon ahli bizga havas bilan qaraydi.

Nuroniy otaxon yoki onaxon  bor oilada fayz-u baraka, farovonlik, ahillik boʻlishini barchamiz bilamiz. Ularning duosi bilan yurtimiz obod, hayotimiz tinch, dasturxonimiz toʻkin. Yurtimizda azaldan keksalarga mehr koʻsatilib kelingan, mustaqillik sharofati tufayli ularning hurmatini joyiga qoʻyish davlat siyosati darajasiga koʻtarildi.

Istiqlol davrida yillarning nomlanishiga eʼtibor qilsak, bu borada avvalo onalar sogʻligini mustahkamlash, barkamol avlod tarbiyasi va keksalarni eʼzozlash har doim ustuvor vazifalar sifatida belgilanganiga guvoh boʻlamiz.

Prezidentimiz tashabbusi bilan 2015-yil "Keksalarni eʼzozlash yili” deb nomlanishi zamirida ham inson manfaati yotadi.

Keksalarga boʻlgan gʻamxoʻrlik va eʼtiborni kuchaytirish, yoshi ulugʻ insonlarni davlat va jamiyat tomonidan ham moddiy, ham maʼnaviy jihatdan qoʻllab-quvvatlashga oid qator meʼyoriy-huquqiy hujjatlar qabul qilingan boʻlib, ularda belgilangan vazifalarning bajarilishi natijasida keksalarimizning yashash sharoiti yaxshilanib, salomatligi mustahkamlanayapti.

Oʻzbekiston Respublikasi Prezidentining 2015-yil 18-fevraldagi qarori bilan "Keksalarni eʼzozlash yili” davlat dasturi tasdiqlandi. Mazkur dasturga koʻra yil davomida keksalarning hayot darajasi va sifatini yanada yaxshilash, ularni moddiy va maʼnaviy qoʻllab-quvvatlash koʻlamini kengaytirish, yoshi ulugʻ insonlar, ayniqsa 1941-1945-yillardagi ikkinchi jahon urushi va mehnat fronti faxriylariga ijtimoiy, pensiya taʼminoti va tibbiy xizmat koʻrsatishni takomillashtirish, yoshlarni oʻzbek xalqining koʻp asrlik qadriyat va anʼanalari ruhida tarbiyalashda keksalarning oʻrnini mustahkamlash koʻzda tutilgan.

Ushbu dastur doirasida keksalarni eʼzozlash, oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish, moddiy yordam koʻrsatish, keksa yoshdagi otaxon va onaxonlarning roʻzgʻor tashvishlarini yengillashtirish uchun shart-sharoitlarni yaratish, taʼlim-tarbiya tizimi va sportning rolini kuchaytirish, bolalar, ayniqsa keksalar oʻrtasida jismoniy tarbiya va sportga mehr uygʻotish boʻyicha aniq chora-tadbirlarni amalga oshirish, tadbirkorlikni rivojlantirish boʻyicha mahalla va boshqa jamoat tuzilmalarining rolini oshirish, kam taʼminlangan oilalarga moddiy va maʼnaviy yordam koʻrsatish masalalariga alohida eʼtibor qaratilgan. Bu borada 2-sonli tuman Davlat notarial idorasi xodimlari tomonidan qator ishlar amalga oshirilmoqda. Joylarda uch avlod uchrashuvlari tashkil qilinib, "Keksalarni eʼzozlash yili” davlat dasturining mazmun-mohiyatini keng jamoatchilikka tushuntirish  ishlari olib borilmoqda. Bundan tashqari, notarial idorada keksa otaxon va onaxonlarimizga navbatsiz, bepul maslahatlar berish joriy qilingan.

Keksalarni eʼzozlashdek insonparvarlik zamirida ulkan maʼno-mazmun mujassam. Zero farzandlar kamoli – yurt qudratini, ayollarga munosabat - madaniyatimiz darajasini, keksalarga hurmat va eʼtibor esa maʼnaviyatimiz istiqbolini belgilaydi. Zotan, nuroniylari bor elga qut-baraka yogʻiladi, el aro tinchlik, yurtda farovonlik boʻladi.