ELU YuRTGA MASLAHATGOʻY NURONIY

Kattalarni hurmat qilish xalqimizning qon-qoniga singib ketgan qadriyatlaridandir.

Haqiqatan ham, qaysi oila hayotiga nazar solsangiz, kattalar dasturxon toʻrida oʻtirishadi. Yeguliklar ham dasturxonga ularning raʼyiga qarab qoʻyiladi. Yoki biror ishga albatta kattalar muhokamasidan oʻtib, yoʻl-yoʻriq olingach, qoʻl uriladi. Toʻy-maʼrakalarga borsangiz yoki biron oilada qarindoshlar yigʻilsa-da, eng avvalo keksa odamlarga hurmat-ehtirom koʻrsatiladi. Yoshi ulugʻlarning soʻzini hech kim boʻlmaydi, nasihatlariga quloq soladi. Yoshi ulugʻ kishilar nafaqat oʻz farzandlariga, balki, eldoshlariga ham yoʻl-yoʻriq beradi.

Mening bobom, xalq taʼlimi faxriysi Ibrohim Ismoilov ana shunday insonlarning biri.

U 1959-yili Berdaq nomidagi Qoraqalpoq Davlat Universitetining chet tillar fakultetini tugatgan. Oʻqituvchi, tuman yoshlari tashkiloti rahbari, xalq taʼlimi xodimlari kasaba uyushmasi tashkiloti yetakchisi boʻlgan. Shuningdek, xalq taʼlimi boʻlimi mudiri oʻrinbosari va mudiri lavozimlarida faoliyat yuritgan.

Bobom tumanimizda xalq taʼlimi ravnaqiga munosib hissa qoʻshgan inson, desam aslo adashmayman. Shu boisdan-da koʻcha-koʻyga birga chiqqanimizda koʻpchilik odamlar "ustoz” deb salomlashib, hol-ahvol soʻrashadi.

Men bobomnikiga mehmonga borishni orziqib kutaman. Chunki bobom, momom bilan suhbatlashish juda maroqli. Qolaversa, ularnikida juda koʻp oʻzbek mumtoz adabiyoti, jahon adabiyoti va hozirgi davr adabiyotining nodir namunalari bor. Men ularni oʻqib, yana avaylab joyiga qoʻyaman. Bu - bobom oʻrgatgan odat.

Bobomning kitoblarini mendan boshqa tanishlari, qoʻshnilari ham olib oʻqishadi, rahmat aytib qaytarib olib kelishadi. Bobom esa bunday paytlarda kitob yuzasidan suhbatlashishdan hech zerikmaydi.

Men shunday vaqtlarda shu ajoyib insonning nevarasi ekanimdan faxrlanib ketaman.

Yurtimizda yoshlarni yaxshi yoʻlga chorlab turuvchi maʼrifatli va zukko keksalarimiz hamisha omon boʻlsin!

Sevara ANVAROVA, Amudaryo akademik litseyi oʻquvchisi.