YoZUVChI BILAN UChRAShUV

Tumanimizdagi 8-sonli umumtaʼlim maktabida turli maʼnaviy-maʼrifiy mavzudagi tadbirlar tez-tez oʻtkazilib turiladi. Ayniqsa, "Men oʻqigan kitoblar”, "Shoirlar madhida - Oʻzbekiston”, "Men sevgan yozuvchi” kabi tadbirlar oʻquvchilarning nutq madaniyatini oʻstirishda muhim omil boʻlmoqda.

Yaqinda maktab oʻquvchilari yana bir goʻzal ruhda oʻtgan maʼnaviy-maʼrifiy tadbirdan olam-olam zavq oldilar. Maktabning sobiq oʻquvchisi, iqtidorli yozuvchi, "Oqibat”, "Sogʻinch”, "Asrangan oltin”, "Taqdir oʻyinlari”, "Lafz”, "Oʻqilmagan maktub” kabi oʻndan ortiq kitoblarning muallifi Bahodir Xudoyberganov bilan uchrashdilar. Oʻquvchilar B.Xudoyberganov qalamiga mansub asarlardan olgan taassurotlari haqida toʻlqinlanib soʻzladilar. "Yuqori qishloq” MFY raisi Komiljon Eshimmatov, 8-sonli maktab oʻqituvchilaridan Nargiza Ismoilova, Zulfiya Yodgorova, "Yuqori qishloq” MFY diniy maʼrifat va maʼnaviy-axloqiy tarbiya masalalari boʻyicha maslahatchisi Muyassar Otajonovalar Qilichboydan yetishib chiqqan taniqli yozuvchi, detektiv asarlar muallifi B.Xudoyberganov qalamga olgan mavzular yoshlar tarbiyasida muhim ahamiyat kasb etishini taʼkidlashdi.

Oʻz navbatida B.Xudoyberganov kitoblarining yozilish tarixi va oʻzining kelgusi ijodiy rejalari haqida gapirdi hamda oʻquvchilarni qiziqtirgan savollarga javob berdi.

M.JUMAMURODOV,

shu maktab direktori.