Hǝkimshilik sudlardıń 2022-jıl avgust ayındaǵı iskerliginen

Nókis rayonlar aralıq hákimshilik sudı tárepinen 2022-jıl avgust ayında hákimshilik uyımlar, puqaralardıń ózin-ózi basqarıw uyımları hámde olardıń lawazımlı shaxslarınıń qararları, háreketleri boyınsha jámi 60 is kórilgen bolıp, sonnan 26 is boyınsha puqaralardıń múrájáátleri qanaatlantırılıp, buzılǵan huqıqları tiklendi.

Sonnan, 28 is boyınsha usınılǵan talaplar tiykarsız bolǵanlıǵı sebepli, arzalar qanaatlantırılmastan qaldırıldı, 6 is óndiristen qısqartılǵan.

Kórip tamamlanǵan islerdi iske juwapker sıpatında qatnastırılǵan hákimshilik uyımlar kesiminde alıp qaraytuǵın bolsaq, 15 is boyınsha jergilikli hákimlikler, 20 is boyınsha Byudjetten tısqarı pensiya qorınıń rayon (qala) bólimleri, 1 is boyınsha İshki isler uyımları, 4 is boyınsha mámleketlik salıq komiteti uyımları, 5 is boyınsha mámleketlik kadastr agentligi, 11 is boyınsha Bas prokuratura janındaǵı Májbúriy orınlaw byurosı rayon (qala) bólimleri, 1 is jeke ámeliyat penen shuǵıllanıwshı notarius xám 3 is boyınsha basqa uyımlar qararları hámde olar lawazımlı shaxslarınıń háreketleri (háreketsizligi) ústinen berilgen arzalarǵa tiykar kórip shıǵılǵan.

Kórip tamamlanǵan islerden 11 is, yaǵnıy 18,3 payız isler kóshpeli sud májilislerinde kórip shıǵılǵan.

Sud iskerligine zamanagóy texnologiyalardıń yengiziliwi nátiyjesinde 20 is, yaǵnıy 33,3 payız is puqaralar sudqa kelmesten videokonferentsbaylanıs rejiminde ótkerilgen sud májilislerinde kórip shıǵılǵan.

Jol qoyılǵan nızam buzılıw jaǵdayların saplastırıw, aldaǵı waqıtları boldırmaw maqsetinde tiyisli uyımlarǵa 22 jaǵdayda ayrıqsha uyǵarıwlar shıǵarılıp, orınlaw ushın jiberilgen.

Sonday-aq, Qaraqalpaqstan Respublikası hákimshilik sudınıń apellyatsiya instantsiyasında 2022-jıldıń avgust ayında jámi 14 ǵalaba huqıqıy qatnasıqlardan kelip shıǵatuǵın arzalar boyınsha isler kórilgen.

Sonnan, 11 is boyınsha sud qararları ózgerissiz qaldırılǵan, 3 is boyınsha sud qararı biykar yetilgen. Jol qoyılǵan nızam buzılıw jaǵdayların saplastırıw, aldaǵı waqıtları boldırmaw maqsetinde
1 jaǵdayda ayrıqsha uyǵarıw shıǵarılıp, tiyisli uyımlarǵa orınlaw ushın jiberilgen. Juwmaqlap aytqanda, mámleketimizde puqaralar hám yuridikalıq shaxslardıń huqıqların nátiyjeli qorǵawda hákimshilik sudlardıń rolin kúsheytiriw boyınsha ámelge asırılıp atırǵan reformalar belgilengen maqsetlerdiń ámelge asırılıwı hámde insan mápleriniń nátiyjeli qorǵalıwın támiyinlewge xızmet yetedi.

R.Xudayberganova, Qaraqalpaqstan Respublikası hǝkimshilik sudı sudyası