PARA BERİWGE QIZIQTIRIP, ALDADI
Jumabek Maxsudov (isimler ózgertildi) óziniń qılmıs isine II topar mayıplıǵı bar ákesin de aralastırdı. Lekin, ákesi dáslebinde neniń-ne yekenligin túsinbegen yedi.
Bir kúni rayonlıq gaz támiynatı kárxanasında slesar bolıp islep júrgen Jumabekten onıń tanısı Sarvar “Temir jollarda kópir qurıw otryadında tanısıń joq pa. Bir aǵayinim jumısqa kirmekshi yedi” dep sorap qaldı. Oyına dárhal aldap, pul tabıw niyeti kelgen Jumabek “Bir tanıslar bar yedi, ilajlap kóremiz” deydi. Soń Sarvar aǵayini Fazılǵa bul xabardı aytıp, bárin ózi sóylesiwi ushın Jumabektiń telefon nomerin beredi. Keyin ala Fazıl Jumabek penen ushırasadı. Jumabek onda gúman tuwǵızbaw ushın sol kárxanada juwapkerli jumısta isleytuǵın tanısı arqalı para yesesine jumısqa kirgize alatuǵınlıǵın aytıp, onı para beriwge iytermeleydi. Soń sol “juwapker xızmetker” menen sóylesiw ushın aldap, ákesiniń telefon nomerin beredi hám qashan qońıraw yetiw kerekligin de aytıp ketedi.
Belgilengen waqıtta Fazıl jumıs máselesinde “kárxanada juwapkerli xızmetker”ine qońıraw yetedi. Sonda Jumabek bul Fazıl yekenin bilip, óziniń dawısın tanıp qoymawı ushın telefondı ákesine beredi. Soń onıń janında otırıp, qanday gáplerdi sóylewin ákesine sıbırlap aytıp otıradı. Balasınıń aytqan gáplerin telefonǵa qaytalap otırǵan ákesi dáslebinde neniń-ne yekenligin túsinbeydi. Keyin ala jumısqa kirgiziw ushın “6 mln. sum puldı, qay jerge alıp keliw kerekligi” haqqındaǵı sózlerden keyin, bul istiń qıńır yekenligin sezedi. Ol balasın bul joldan qaytarmaqshı da boladı. Lekin, Jumabek “isti pisirip” bolǵanın, hesh nárse bolmaytuǵının bildirip, aytqanınan qaytpaydı.
Sol aralıqta Fazıl telefon sóylesiwlerinen gúmanlanıp, Ózbekstan temir jolları AJ kópir qurıw kárxanasına ózi barıp, jumıs sorap kelgenin bildirip, kárxananıń juwapker xızmetkerine xabarlasadı. Keshe telefonda jumıs máselesinde sóylesken adamı bul jerde islemesligi, onı aldamaqshı bolǵanlıǵın bilip, huqıq qorǵaw uyımına xabarlasadı.
Huqıq qorǵaw uyımları tárepinen operativ ilaj shólkemlestirilip, Fazıl Jumabektiń aytqan jerine 6 mln. sumdı alıp keledi. Óziniń avtomashinasında kelgen Jumabek puldı alıp, avtomashinasınıń bardachogine salǵan waqıtta huqıq qorǵaw uyımı xızmetkerleri kelip, jınayat ústinde irkiwge aladı...
Bul halat boyınsha Jumabek Maxsudovtıń qarsısına jınayat isi qozǵatılıp, ol sud tárepinen tiyisli jazaǵa húkim yetildi.
Salamat DÁWLETMURATOV, Aralboyı transport prokurorı.
▶
