JISMONIY VA YuRIDIK ShAXSLARNING MUROJAATLARI DOIMO EʼTIBORDA
Davlatimiz tomonidan jismoniy va yuridik shaxslarning murojaatlarini koʻrib chiqilishiga nisbatan berilayotgan eʼtiborning kundan-kun ortib borayotganligi, barcha davlat va xoʻjalik boshqaruvi organlari, mahalliy davlat hokimiyati va boshqaruvi organlari, mulkchilik shakllaridan va idoraviy boʻysunuvidan qatʼiy nazar xoʻjalik yurituvchi subʼektlarga yuksak masʼuliyat yuklamoqda.
Bu borada qabul qilinayotgan qonun hujjatlarining asosiy maqsadlaridan biri aholi bilan toʻgʻridan-toʻgʻri muloqotni tashkil etish, jismoniy va yuridik shaxslarning huquq va erkinliklari hamda qonuniy manfaatlarini toʻlaqonli himoya qilishga qaratilgan.
Ayniqsa, yangi tahrirdagi Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni qabul qilinishi murojaatlar bilan ishlashga oid munosabatlarni tartibga solishda alohida ahamiyat kasb etdi. Xususan, Qonunning 3-moddasida ariza, taklif, shikoyat kabi asosiy tushunchalardan tashqari elektron murojaat, takroriy murojaat, anonim murojaat, murojaatning dublikati, ommaviy qabul, videokonferentsaloqa hamda davlat ishtirokidagi tashkilot kabi tushunchalar ham kiritildi. Belgilangan tartibda axborot-kommunikatsiya texnologiyalari vositasida berilgan, shu jumladan tashkilotning rasmiy veb-saytiga joylashtirilgan murojaatga elektron murojaat deb taʼrif berilgan.
Qonun hujjatlaridan maʼlumki, takroriy murojaat ayni bir murojaatchidan kelib tushgan, uning avvalgi murojaati yuzasidan tashkilot tomonidan qabul qilingan qarori ustidan shikoyati yoki murojaatni qonun hujjatlarida belgilangan muddatlarda koʻrib chiqilmaganligidan noroziligi bayon etilgan murojaatga aytiladi. Buni, murojaatning dublikatidan farqlash muhim ahamiyatga ega chunki, murojaatning dublikatida ayni bir jismoniy yoki yuridik shaxs murojaatining koʻchirma nusxasi beriladi. Yaʼni, murojaat muallifi murojaat boʻyicha tegishli tashkilotdan javob olmay turib, uning qarorini bilmay turib, oʻsha murojaatni koʻchirma nusxasini takroran taqdim etishi tushuniladi.
Yana bir muhim yangiliklardan biri shundaki, agar takroriy murojaatlarda yangi vajlar yoki yangidan ochilgan holatlar keltirilmagan boʻlsa, ilgarigi murojaat materiallarida esa tekshiruvlarning toʻla-toʻkis materiallari mavjud boʻlsa va murojaat qiluvchiga belgilangan tartibda javoblar berilgan boʻlsa, murojaatchiga takroriy murojaatning asossizligi va ushbu masala yuzasidan u bilan yozishmalar tugatilishi toʻgʻrisida yozma ravishda xabardor qilib, koʻrib chiqishni tugatish mumkin.
Muxtasar aytganda, yangi tahrirdagi Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni murojaat etuvchilarning qonuniy talablarini oʻz vaqtida hal etilishiga, huquq va manfaatlarini yanada samarali himoya qilinishiga xizmat qiladi.
Q.Xojamuradov, Beruniy tumanlararo Iqtisodiy sudining sudyasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
