YoNGʻINNI BARTARAF ETISh BOʻYIChA AMALIY TAKTIK MAShGʻULOT OʻTKAZILDI

Ota-bobolarimiz yongʻinni bejizga tilsiz yov, deb atashmagan. Xonadonlarda yoki korxona-tashkilotlarda, umumiy ovqatlanish, savdo shoxobchalarida salgina ehtiyotsizlik yo nosoz uskunalaridan foydalanish yongʻin kelib chiqishiga,  koʻpgina talofatlarga sabab boʻlishi mumkin. Ayniqsa, kuz-qish mavsumida kunlar sovib ketishi oqibatida tabiiy gaz, elektr energiyasiga ehtiyoj kuchayadi. Ushbu qulayliklardan foydalanishda oʻta ehtiyotkorlik talab etiladi.

Bu borada aholi orasida keng targʻibot yurgizilishi, yongʻin kelib chiqishining oldini olish choralari haqida ogohlantirishlarga qaramay, afsuski, yongʻin sodir boʻlishiga barham  berilmayapti. Shunday koʻngilsiz holatlar yuz berishi  oqibatida odamlarning sogʻligʻiga zarar yetishi hollari ham uchramoqda.

14-noyabr kuni tuman Tibbiyot birlashmasida yongʻin sodir boʻlganida chora-tadbirlar qoʻllashni targʻib etishga bagʻishlangan amaliy taktik mashgʻulot oʻtkazildi. “Qoraqalpogʻiston Respublikasi Favqulodda vaziyatlar boshqarmasi boshligʻi, uning oʻrinbosarlari, boʻlim va boʻlinma boshliqlari, qism navbatchi smena tarkibi bilan 2020-yilda oʻtkaziladigan yongʻin oʻchirish amaliy taktik  mashq va mashgʻulotlar yillik rejasi”ga muvofiq oʻtkazilgan ushbu tadbir ikki bosqichda amalga oshirildi. Dastlab  kasalxona binosining 3-qavatida joylashgan jarrohlik boʻlimi oshxonasida shartli ravishda yongʻin holati sodir qilindi va ushbu koʻngilsiz hodisada jarohat olgan shaxslar yongʻin oʻchirish  avtonarvoni yordamida boʻlim joylashgan 3-qavatdan evakuatsiya qilindi.

Tadbirning ikkinchi bosqichida esa birinchi bosqichda jabrlanganlar  xavfsiz hududga olib chiqildi va birinchi tibbiy yordam koʻrsatildi.

Yuz bergan yongʻinni tezkorlik bilan oʻchirish boʻyicha amaliy taktik oʻquv mashgʻulotiga Taxiatosh tumani Favqulodda vaziyatlar boʻlimidan 1 ta yongʻin oʻchirish avtokarvoni, yongʻin oʻchirish uskunasi, tuman  Favqulodda vaziyatlar boʻlimidan 3 ta maxsus yongʻin oʻchirish avtomobillari, 57 nafar shaxsiy tarkib aʼzolari jalb qilindi.

Ushbu amaliy taktik mashgʻulotga Qoraqalpogʻiston Respublikasi Favqulodda vaziyatlar boshqarmasining Tezkor boshqaruv markazi boshligʻi, podpolkovnik Bahrom Yaxshiboyev, guruh rahbari Rustam Seytirzayev, tuman Favqulodda vaziyatlar boʻlimi boshligʻi Hamro Matyoqubov, tuman Tibbiyot birlashmasi bosh shifokori Zokir Oʻrozboyevlar ishtirok etdilar. Masʼullar yoʻl qoʻyilgan xato-kamchiliklar xususida batafsil bayon etib, ularni bartaraf etish yuzasidan oʻz maslahatlarini, tavsiyalarini berdilar.

Yongʻin sodir boʻlganda uni oʻchirish, jabrlanganlarni xavfsiz hududga oʻtkazish va ularga birinchi yordam koʻrsatish yuzasidan oʻtkazilgan amaliy taktik mashgʻulot fuqarolarga shunday koʻngilsiz voqeaga duch kelganida qanday yoʻl tutishi lozimligi xususida koʻpgina maʼlumotlar yetkazgani bilan ahamiyatli boʻldi.

O.RAJABOVA.