IChKI IShLAR ORGANLARI XALQIMIZNING HAQIQIY HIMOYaChISIGA AYLANMOQDA

Yurtimizda tinchlikning barqaror boʻlishiga erishish, inson huquq va erkinliklariga rioya etilishini taʼminlash, aholi turmush sifatini oshirish, barcha jabhalarda olib borilayotgan islohotlardan koʻzlangan asosiy  maqsad fuqarolarning emin-erkin, baxtiyor, oʻz hayotidan rozi boʻlib yashashiga erishishdir. Albatta, bunda jamoat tartibini saqlash, xalqimiz xavfsizligini taʼminlash, huquqbuzarliklarning oldini olish juda muhim. Chunki amalga oshirilayotgan jami oʻzgarishlar, yangilanishlar asosi tinchlik ekanligi barchaga ayon.
Mamlakatimizda bugungidek turmush tarzi barqaror boʻlishida Ichki ishlar organlari xodimlarining munosib oʻrni bor. Ular globallashuv jarayoni tezkor kechayotgan davrda yuzaga kelayotgan xavf-xatar va tahdidlar, xalqaro terrorizm, diniy ekstremizm, noqonuniy migratsiya, odam savdosi, yoshlar orasida yot gʻoyalar tarqalishining oldini olishdek gʻoyat dolzarb va masʼuliyatli vazifani sharaf bilan ado etmoqdalar. Yurtimizda koronavirus infektsiyasi tarqalishining oldini olish boʻyicha oʻrnatilgan karantin cheklovlariga amal qilinishini nazorat qilishda, ayniqsa, tun-u kun fidoyilik qilishayapti.
Ana shunday ezgu maqsad yoʻlida mehnat qilayotgan tuman Ichki ishlar boʻlimi xodimlarining faoliyati samaradorligini oshirish maqsadida ularga qulay sharoitlar yaratilgan. Shularning natijasida 2020-yilning oʻtgan 9 oyida qasddan ogʻir tan jarohati yetkazish, transport vositasini qasddan olib qochish, ehtiyotsizlik tufayli ogʻir tan jarohati yetkazish, mulkka qasddan ziyon yetkazish, pornografik mahsulotlarni tarqatish kabi jinoyat turlariga butunlay barham  berildi. Shuningdek, oʻrtacha ogʻir tan jarohati yetkazish jinoyati 33 foizga, oʻzlashtirish yoki rastrata qilish 75 foizga, mansab soxtakorligi 33 foizga kamayishiga erishildi. Afsuski, umumiy jinoyatchilik oʻtgan yilning mos davriga solishtirilganda 17 taga oshgan.
Kelgusida buningdek koʻngilsiz holatlarning oldini olish uchun jamoatchilik institutlari, mahalla faollari bilan hamkorlikda jinoyat sodir etishga moyil shaxslar aniqlanib, ular bilan profilaktik ishlar olib borilib, toʻgʻri yoʻlga solishga harakat qilinayapti. Profilaktika inspektorlari obroʻ-eʼtiborli insonlar bilan birgalikda notinch oilalar, tarbiyasida boʻshliq paydo boʻlgan yoshlar bilan alohida shugʻullanib, ularni toʻgʻri yoʻlga solish choralarini koʻrayotir. Natijada tumanimizning Qipchoq, Jumurtov shaharcha fuqarolar yigʻinlari, Uyshin, Gulzor, Bogʻ, Yuqori qishloq, Qilichboy, Xizir eli, Besh ovul, Tosh qalʼa, Qoramon, Doʻrman, Boʻz solma, Yangiobod, Farovon, Boʻzyop, Xitoy, Toryop, Bobur kabi ovul va mahallalarida joriy yilimizning oʻtgan davrida umuman jinoyatchilik sodir etilmadi.
Tuman Ichki ishlar boʻlimi xodimlari 274 nafar profilaktik hisobda turuvchi shaxslar bilan mahalla faollari, jamoatchilik vakillari bilan hamkorlikda 1787 marotaba profilaktik targʻibot ishlari olib borganligi tufayli ular tomonidan qayta jinoyat sodir etilishiga yoʻl qoʻyilmadi.
Joriy yilimizning oʻtgan 9 oyi davomida jazoni ijro etish muassasalaridan boʻshatilgan 46 nafar muqaddam sudlangan shaxslar IIB tomonidan hisobga olinib ularning barchasiga moddiy yordam berildi, tibbiy koʻrikdan oʻtkazildi, fuqarolik pasporti olishiga koʻmaklashildi va ishga joylashtirish choralari koʻrilmoqda. Shuningdek, koʻchalarda, jamoat joylarida jamiyatda yurish turish qoidalarini buzgan 64 nafar fuqarolarga maʼmuriy choralar koʻrildi, profilaktik tushuntirish ishlari olib borilib, ular tomonidan bezorilik, jinoyatlar sodir etilishining oldi olindi.
Tumanimizning barcha hududida fuqarolar orasida ov qurollarini saqlash, ov qilish qoidalari haqida profilaktik targʻibot ishlari olib borilganligi natijasida 15 nafar fuqarolar oʻq otar qurollarini oʻz xohishlariga koʻra tuman Ichki ishlar boʻlimiga olib kelib topshirdilar.
Boʻlim xodimlari huquqbuzarlik va jinoyatchilikning oldini olish yuzasidan taʼlim  muassasalarida 649-marta, korxona-tashkilotlarda 18-marta, mahalla va ovul fuqarolar yigʻinlarida 997-marta tegishli organlar xodimlari bilan hamkorlikda profilaktik tushuntirish ishlarini olib borishdi.
Ichki ishlar boʻlimining Migratsiya va fuqarolikni rasmiylashtirish boʻlimi tomonidan joriy yilda 1926 nafar fuqarolarning maʼlumotlari qabul qilinib, 2099 nafar fuqarolarga yangi biometrik pasport rasmiylashtirib berildi. 861 nafar fuqaroga xorijga chiqish biometrik pasportlari berildi.
Yilning oʻtgan davrida “Pasport viza” tadbirlari davomida 6515 obʼekt va 986 xonadonda pasport rejimiga amal qilinishi yuzasidan tekshiruvlar oʻtkazildi va 138 fuqaro pasport tizimi qoidalarini buzib yashab yurganligi aniqlandi. Ularga maʼmuriy choralar koʻrilib, yangi biometrik pasport rasmiylashtirib berildi.
Tuman Ichki ishlar boʻlimi boshligʻi Ulugʻbek Xudoyberganov oʻzi rahbarlik qilayotgan 3-sektor hududi aholisi holidan xabar olib,  uchrashuvlar, sayyor qabullar oʻtkazib turadi. Shunday tadbirlarda bildirilgan murojaatlarga koʻra yaqinda Boʻzyop ovulida yashovchi, 2-guruh nogironi boʻlgan qizga tikuv mashinasi topshirildi. Xitoy va Boʻzyop ovullarida istiqomat qiluvchi ishsiz ikki ayolga imtiyozli kredit hisobiga zamonaviy tikuv mashinalari topshirildi va bandligi taʼminlandi. Tuman Ichki ishlar boʻlimi boshligʻi Ulugʻbek Xudoyberganov va Prezidentning tumandagi Xalq qabulxonasi mudiri Erkin Rajabovlardan tikuv mashinasini qabul qilib olgan ushbu ayollarning quvonchi cheksiz boʻldi.
Muhtaram Yurtboshimiz Ichki ishlar organlarini xalqchil tuzilmaga, fuqarolarning chinakam himoyachisiga aylantirish zarurligini taʼkidlagan edilar. Muhtasham, ulkan binoning zamonaviy axborot kommunikatsion texnologiyalar bilan jihozlangan xonalarida faoliyat yuritayotgan tuman Ichki ishlar boʻlimi xodimlari zimmalariga qoʻyilayotgan talablarga monand faoliyat yuritishga intilmoqdalar. Tinchlik-osoyishtalikni mustahkamlashga, jamoat tartibini saqlashga erishish yoʻlida butun kuch-gʻayratlarini safarbar etmoqdalar.
2006-yil 6-dekabrdagi Oʻzbekiston Respublikasi Qonuniga muvofiq, 25-oktyabr mamlakatimizda Ichki ishlar idoralari xodimlari kuni etib belgilangan. Har yili 25-oktyabr – Oʻzbekiston Respublikasi ichki ishlar idoralari xodimlari kuni sifatida keng nishonlanadi. Biz ham yurt tinchligi va xalq osoyishtaligi yoʻlida samarali xizmat qilayotgan tuman Ichki ishlar boʻlimi xodimlarini kasb bayramlari bilan muborakbod etamiz.

Oygul RAJABOVA.