FAVQULODDA VAZIYaTLARDA FUQARO MUHOFAZASINI TAʼMINLASh BOʻYIChA TAKTIK OʻQUV-MAShGʻULOTLARI OʻTKAZILDI

Hayot faoliyati davomida xalqimizning  xavfsizligini taʼminlash, inson hayoti va faoliyati uchun qulay sharoit, yaʼni insonlar tomonidan shakllantirilgan muhitni va ishlab chiqarishda mehnat muhofazasini tashkil etish, atrof-muhitga texnogen taʼsirlarni kamaytirish muhim ahamiyat kasb etadi. Zamonaviy texnik vositalardan, nazorat usullaridan hamda maʼlumot va mavjud vaziyatlardan oqilona foydalanish hisobiga inson hayoti va sogʻligini asrash bilan  bogʻliq kompleks vazifalarni ado etishda Favqulodda vaziyatlar Boshqarmasi, xodimlari tomonidan bajariladigan ishlar bu borada alohida oʻrin tutadi.

Xususan, turli koʻrinishdagi xavf-xatarlar, yashash muhiti xavflari, xavfli tabiiy hodisalar, yoʻl-trasport harakatiga oid, shuningdek, elektr uskunalaridan foydalanish boʻyicha texnika xavfsizligi qoidalarining buzilishi, yongʻin xavfi inson hayotini xavf ostida qoldiradi. Bunday favqulodda hodisalar sodir boʻlganda fuqarolar muhozafasini taʼminlash, xavfni bartaraf etish choralarining tezkorlik bilan koʻrilishi koʻplab falokatlarning oldi olinishini taʼminlaydi.

21-oktyabr kuni tuman Favqulodda vaziyatlar boʻlimi tomonidan “Jayxun mobil gaz” masʼuliyati cheklangan jamiyati taktik oʻquv-mashgʻuloti oʻtkazildi. Tadbirga jami 63 ta shaxsiy tarkib va 12 ta texnika jalb qilindi. Mazkur taktik oʻquv-mashgʻulotida “Jayxun mobil gaz”  masʼuliyati cheklangan jamiyatida favqulodda vaziyat sodir boʻlganda, yongʻin kelib chiqqanda, texnika xavfsizligi qoidalariga rioya qilinmaganda, elektr uskunalaridan notoʻgʻri foydalanganda, shuningdek, is gazidan zaharlanish holatlari kabi inson hayotiy faoliyati bilan bogʻliq xavf-xatarlar yuz berganda tuman Favqulodda vaziyatlar Boshqarmasi va davlat  tashkilotlari xodimlarining hamkorlikdagi harakatlari amaliy mashqlar orqali koʻrsatib berildi.

Shuningdek, Amudaryo paxta tozalash zavodida ham ana shunday taktik oʻquv-mashgʻuloti oʻtkazildi. Unda 51 ta shaxsiy tarkib aʼzolari, 14 ta texnika vositalari ishtirok etdi. Mashgʻulotlarda mazkur sanoat korxonasi hududida tabiiy hamda texnogen xususiyatli favqulodda vaziyatlar, inson faoliyati bilan bogʻliq turli koʻrinishdagi xavf-xatarlar, xususan, yongʻin chiqqanda, texnika xavfsizligi qoidalari buzilganda, elektr uzatish tizimlaridan notoʻgʻri foydalanganda, is gazidan zaharlanganda Favqulodda vaziyatlar boshqarmasi hamda davlat tashkilotlari tomonidan amalga oshiriladigan tezkor harakatlar amaliy mashqlar orqali namoyish etildi.

Shu kuni Qipchoq panton koʻprigida ham 51 ta shaxsiy  tarkib va 11 ta texnika jalb qilingan holda taktik oʻquv-mashgʻulotlari oʻtkazildi. Tuman Favqulodda vaziyatlar boshqarmasi davlat tashkiloti hamkorligidagi taktik  oʻquv-mashgʻulotlarida Amudaryo ustiga qurilgan panton koʻprigida  favqulodda hodisalar sodir boʻlganda mavjud vaziyatdan kelib chiqib amalga oshiriladigan qutqaruv ishlari, ofatni bartaraf  etish choralari boʻyicha amaliy mashqlar oʻtkazildi. Xususan, panton koʻprigida falokatli holatlar kuzatilganda, yongʻin xavfi, elektr uskunalaridan notoʻgʻri foydalanish, shuningdek, koʻprik hududida muz tiqilganda suv toshqini  yuz berganda amalga oshiriladigan tezkor qutqaruv ishlari amaliy mashqlar orqali koʻrsatildi.

Bu kabi taktik oʻquv-mashgʻulotlarini oʻtkazishdan koʻzlangan maqsad, xalqimizning salomatligi, tinch-osoyishtaligi hamda mamlakat, shu jumladan tumanimiz iqtisodiy taraqqiyotini taʼminlashga hissa qoʻshishdir.

Taktik oʻquv-mashgʻulotlarida yoʻl qoʻyilgan kamchiliklar ham alohida qayd etilib, kelgusida  bunday nuqsonlarga yoʻl qoʻymaslik yuzasidan zarur tushuncha va tavsiyalar berildi.

Robiya YOʻLDOShEVA.