SAYLOVGA MUNOSIB TAYYoRGARLIK KOʻRILMOQDA

Shu yil 20-sentyabr yakshanba kuni Xalq deputatlari Amudaryo tuman Kengashida boʻshab qolgan oʻrinlarga boʻlib oʻtadigan saylovlarga 24-Oq oltin va 28-Daryoboʻyi saylov okruglarida munosib tayyorgarlik ishlari olib borilmoqda.  
Oʻtgan 2019-yilda qabul qilingan Saylov kodeksi mamlakatimiz siyosiy hayotida muhim ahamiyat kasb etadigan saylov jarayonlarini mukammal darajada tashkil qilish, saylovlarni ochiq, oshkoralik tamoyillariga asoslangan holda oʻtkazish, shuningdek, saylov qonunchiligi asoslarini yanada mustahkamlash borasida muhim hujjat boʻldi. Saylov kodeksining qabul qilinishi bilan saylov qonunchiligida koʻplab oʻzgarishlar kiritildi. Shunday oʻzgarishlardan biri sifatida aytish mumkinki, avval uchastka saylov komissiyalarining aʼzolari jamoatchilikning obroʻli vakillari orasidan tayinlanadi, deb belgilab qoʻyish bilan cheklanilgan boʻlsa, endi Kodeksning 23-moddasiga asosan uchastka saylov komissiyasi aʼzoligiga nomzodlar fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlar tomonidan taklif etilishi mustahkamlab qoʻyildi.
Ushbu qonun hujjatida belgilangan tamoyillarga asoslangan holda tashkil qilinayotgan Xalq deputatlari Amudaryo tuman Kengashida boʻshab qolgan oʻrinlarga saylov oʻtkazish uchun 2 ta saylov okrugi va 4 ta saylov uchastkalari tashkil qilingan boʻlib, shundan 28-Daryoboʻyi saylov okrugi tarkibiga 131-saylov uchastkasi hamda 132-saylov uchastkalari kiradi.
131-saylov uchastkasining uchastka saylov komissiyasi Qipchoq shaharchasida 1-sonli kasb-hunar maktabi binosida joylashgan boʻlib, uchastka chegaralari Qipchoq shaharcha fuqarolar yigʻini hududida joylashgan barcha turar joylar hamda Daryoboʻyi mahalla fuqarolar yigʻinidagi Taraqqiyot aholi punkti janubiy qismidagi 75 ta turar joylardan boshqa barcha turar joylar qamrab olingan. Mazkur saylov uchastkasidagi saylov huquqiga ega boʻlgan jami saylovchilar soni 2751 nafarni tashkil qiladi.
Shuningdek, saylov okrugi tarkibidagi 132-saylov uchastkasining uchastka saylov komissiyasi Beshtom mahallasidagi 24-sonli maktab binosida joylashgan boʻlib, unga fuqarolar yigʻini hududidagi Beshtom va Xoʻjakoʻl aholi punktlarida joylashgan turar joylar kiradi. Mazkur hududlardagi saylash huquqiga ega boʻlgan saylovchilar soni 1464 nafardan iborat.
Xalq deputatlari tuman Kengashi deputatligiga 28-Daryoboʻyi saylov okrugida 3 nafar nomzodlar roʻyxatga olingan boʻlib, ular aholi bilan tanishtirilmoqda. okrug saylov komissiyasi aʼzolari saylovga munosib tayyorgarlik koʻrishmoqda. Mazkur okrug saylov komissiyasi Qipchoq shaharcha fuqarolar yigʻini binosida faoliyat olib bormoqda. Ushbu okrug hududiga Qipchoq shaharchasi, Daryoboʻyi va Beshtom mahalla fuqarolar yigʻinlari aholisi qamrab olingan.
28-Daryoboʻyi saylov okrugida 2 ta saylov uchastkalari tashkil etilgan boʻlib, ulardagi saylash huquqiga ega boʻlgan  jami saylovchilar soni – 4215 (toʻrt ming ikki yuz oʻn besh) nafardan iborat.
Tuman saylov komissiyasining qarori bilan tuzilgan 2 ta saylov okrugi hamda ulardagi saylov uchastkalarida saylov jarayoniga puxta tayyorgarlik koʻrildi. Binolar zaruriy jihozlar, saylovga oid qoʻllanmalar bilan taʼminlanib, atroflari obodonlashtirildi.
Mazkur saylov okruglarida deputatlikka nomzodlarga va ularning ishonchli vakillariga saylovoldi tashviqotini olib borishda saylovchilar bilan uchrashuvlar oʻtkazish uchun teng sharoitlar berildi. Saylovchilar bilan uchrashuvlar nomzodlar va ularning ishonchli vakillari tomonidan mustaqil ravishda oʻtkazildi. Nomzodlar har bir uchrashuvda saylovchilarga partiya va oʻzining saylovoldi dasturida belgilangan vazifalar, ularni amalga oshirish yoʻllari haqida batafsil maʼlumot berib bordilar. Ularning saylovoldi dasturidagi partiya gʻoyalari bilan uygʻun holda ilgari surilgan tashabbuslar saylovchilarda katta taassurot qoldirdi.
Ushbu hududlardagi saylovchilar oʻzlari tanlagan nomzodlarga ovoz berish uchun saylov kuniga qizgʻin tayyorgarlik koʻrishmoqda.

Charos Arslonova, tuman hokimligining Axborot xizmati rahbari.