Saylovlarga tayyorgarlik jadal surʼatlarda olib borilmoqda

Mamlakatimizda joriy yilning 22-dekabr kuni boʻlib oʻtadigan saylovlarga tayyorgarlik ishlari ayni paytda yanada qizgʻin tusga kirdi. Chunki, ushbu muhim siyosiy jarayonga sanoqli kunlar qoldi.

Tuman hududida tashkil etilgan saylov komissiyalari qonuniylik, oshkoralik va adolatlilik printsiplariga qatʼiy amal qilgan holda oʻz faoliyatlarini olib borishmoqda. Shuningdek, saylovni milliy qonunlarimiz, boy tajribamiz va umumeʼtirof etilgan xalqaro standartlar talablariga mos ravishda yuqori saviyada oʻtkazish maqsadida tayyorgarlik ishlari jadal surʼatlarda davom ettirishmoqda.

Saylovchilarga qulay sharoit yaratish maqsadida 16-sonli maktab binosida joylashgan 81-saylov uchastkasi ham jihozlanib, tayyor holatga keltirildi. Ushbu saylov uchastkasi hududida saylash huquqiga ega boʻlgan 2420 nafar fuqaro istiqomat qiladi.

Saylov uchastkasida xarita, saylov komissiyalari toʻgʻrisidagi axborot va boshqa zarur maʼlumotlardan iborat bannerlar oʻrnatildi. Uchastka xonalari qonunchilikda belgilangan talablar asosida jihozlandi. Shuningdek, zarur texnika vositalari – telefon, faks, nusxa koʻchirish apparati va tegishli adabiyotlar bilan taʼminlandi. Saylov qonunchiligiga oid maʼlumotlar, saylovchilar huquq va majburiyatlari toʻgʻrisidagi targʻibot vositalari koʻrinarli joyga osib qoʻyildi. Ovoz berish kabinalari, statsionar va koʻchma saylov qutilari ham keltirilib, xonalarga joylashtirildi.

Saylovlarga tayyorgarlik koʻrish va uni uyushqoqlik bilan oʻtkazish maqsadida uchastka saylov komissiyasi aʼzolari oʻz faoliyatini bevosita Oʻzbekiston Respublikasi Markaziy saylov komissiyasi va tuman saylov komissiyasining koʻrsatmalari, topshiriqlari asosida amalga oshirishmoqda. Uchastka saylov komissiyasi raisi Ravshan Oʻrozboyeva, rais oʻrinbosari Nilufar Xolboyeva hamda kotib Nasiba Hayitmurodovalar komissiya aʼzolari bilan hamkorlikda targʻibot va tashviqot ishlarini qizgʻin tarzda tashkil etishmoqda.

Ayni paytda uchastkada belgilangan navbatchilik jadvali asosida masʼullar tashrif buyurayotgan fuqarolar bilan tushuntirish ishlarini olib borishmoqda. Shuningdek, komissiya aʼzolaridan Maryam Ahmedova, Xayrulla Gulmonov, Dildor Oʻrozaliyeva, Nargiza Qurbonboyevalar saylovchilarni saylovchilar roʻyxati bilan tanishtirib, roʻyxatdagi noaniqliklar haqidagi arizalarni qabul qilishmoqda. Saylov kuni oʻz yashash joyida boʻlish va ovoz berishda qatnashish imkoniyati boʻlmagan saylovchilardan komissiya aʼzolari Dinora Qoʻchqorova, Oʻtkir Bobojonov, Bozorboy Xolimbetov, Muqaddas Xoʻjaniyozovalar saylov konvertlarini qabul qilib, tegishli oʻzgartishlar kiritish masalasini hal qilishmoqda. Undan tashqari, hududlarga biriktirilgan masʼullar tomonidan ham fuqarolarni qiziqtirgan savollarga toʻliq va batafsil javoblar berilmoqda.

Uchastkaga tashrif buyurayotgan fuqarolarga, ayniqsa, birinchi marta ovoz beradiganlar, nuroniylar, imkoniyati cheklangan shaxslar hamda yoshlarga yangi Saylov kodeksining mazmun-mohiyati keng tushuntirilib, huquqiy bilimlari oshirilmoqda. Oʻtkazilayotgan targʻibot-tashviqot tadbirlari davomida har bir fuqaro saylovlarda faol ishtirok etishga daʼvat etilmoqda va ularda daxldorlik tuygʻusini kuchaytirishga alohida eʼtibor qaratilmoqda.

O.Xudoyberganova.