Is gazidan zaharlanishning oldini olish boʻyicha tushuntirish ishlari olib borilmoqda

Yongʻin xavfsizligi talablariga rioya qilish har bir yurtdoshimizning burchidir. Afsuski, ayrim kishilarning bu oddiy haqiqatni yetarlicha anglamay yongʻin xavfsizligi qoidalariga eʼtiborsizligi tufayli yongʻinlar kelib chiqmoqda.

2019-yil 10 oy davomida tumanimizda 26 ta yongʻin hodisasi qayd qilindi. Bunday katta-kichik yongʻinlar fuqarolarga anchagina moddiy va maʼnaviy zarar keltirmoqda. Yongʻinlarning kelib chiqish sabablari tahlil qilinganida uylarda gaz va elektr tarmoqlaridan toʻgʻri foydalanmasak, yosh bolalarning qarovsiz qoldirilishi ushbu noxush hodisaning asosiy sabablari ekani ayon boʻladi.

Bunday noxush hodisalarning oldini olish uchun har bir fuqaro yongʻinning oldini olishga doir talab qoidalarga amal qilishi, gaz va elektr uskunalaridan toʻgʻri foydalanishi, bolalarni uyda qarovsiz qoldirmasligi, turar joylar, korxona va muassasa binolaridagi isitish qozonlarining oʻchoq hamda pechlarning yaroqliligini, moʻrilari va gaz plitalarning jumraklari sozligini tekshirib, ularni yongʻinga qarshi kurashish jamiyati orqali koʻrikdan oʻtkazi lozim.

Yana bir bora statistikaga eʼtibor qaratilsa, yil davomida yongʻinlarning koʻpchilik qismi fuqarolarning turar joylarida sodir boʻlgani maʼlum boʻladi. Shuning uchun olovdan toʻgʻri foydalanish chora-tadbirlari haqida tushuncha berish, shuningdek, is gazidan zaharlanishlarning oldini olish maqsadida tuman yongʻin xavfsizligi boʻlimi, favqulodda holatlar boʻlimi va boshqa vakolatli organlar tomonidan aholi xonadonlarida tushuntirish va targʻibot ishlari oʻtkazilmoqda.

Aytish joizki, Oʻzbekiston Respublikasi Vazirlar Mahkamasi Rayosati majlisining 2019-yil 14-oktyabrdagi 150-sonli bayoniga asosan shu kunlarda Respublikamiz boʻyicha is gazidan zaharlanishning oldini olish maqsadida maxsus tadbirlar oʻtkazilmoqda.

Oʻtgan davr mobaynida sodir boʻlgan yongʻinlar hamda gaz va havo aralashmasining chaqnashi, is gazidan zaharlanish bilan bogʻliq baxtsiz hodisalarni inobatga olib, bunday noxush holatlarning oldini olish va aholi turar joylarda yongʻin xavfsizligini taʼminlash ishlari kuchaytirilgan tartibda olib borilmoqda.

Tumanimizda 4 ta ishchi guruh tashkil qilinib, ular tomonidan oʻtkazilayotgan oʻrganishlar davomida ayrim mahallalarda yongʻin xavfsizligi qoidalarini qoʻpol ravishda buzayotgan fuqarolarga nisbatan maʼmuriy bayonnomalar rasmiylashtirilmoqda.

Tuman Yongʻin xavfsizligi boʻlinmasi, Mangʻit shahridagi 3-sonli hamda Qipchoq shaharchasidagi 4-sonli kasbiylashtirilgan yongʻin xavfsizligi qismlari shaxsiy tarkibi tomonidan tumanimiz hududida tadbir boshlangandan shu kunga qadar 1 ming 834 ta fuqarolarga yongʻinning oldini olish va is gazidan zaharlanishlarning oldini olish boʻyicha keng tushunchalar berildi.

Qolaversa, aholiga oʻrganishlar davomida gaz ballonlaridan, gaz va elektr moslamalaridan xavfsizlik qoidalari talablariga asosan toʻgʻri foydalanish, isitish pechlarining moʻrikonlari sozligini doimiy nazorat qilish, nosoz qoʻlbola va oʻzboshimchalik bilan oʻrnatilgan gaz va elektr uskunalaridan foydalanmaslik boʻyicha koʻrsatmalar taqdim qilindi.

Bu kabi tadbirlar sodir boʻlishi  mumkin boʻlgan yongʻinlar, gaz va havo aralashmasining chaqnashi, fuqarolarning is gazidan zaharlanishi va boshqa noxush holatlarning oldini olishga xizmat qiladi.