Qaynotasini ketmon bilan urgan kelin Xotin-qizlar qoʻmitasining kafilligi asosida jazodan ozod qilindi

2019-yil 10-oktyabr kuni Qoraqalpogʻiston Pespublikasi jinoyat ishlari boʻyicha Amudaryo tuman sudi tomonidan tumanning Doʻrman ovul fuqarolar yigʻini maʼmuriy binosida sayyor sud majlisi oʻtkazildi. Unda ovul hududida yashovchi fuqaro Poza Sobirovaning jinoyat ishi koʻrib chiqildi.

Mazkur sud majlisida koʻrib chiqilgan jinoyat ishiga sabab boʻlgan voqea shunday boʻlgan edi:

Fuqaro Poza Sobirova oilasi bilan qaynota va qaynonasidan alohida, “Doʻrman” ovuli hududidagi uyda yashab kelayotgan edi. Uning qaynotasi, yaʼni mazkur sud ishida jabrlanuvchi sifatida qayd qilingan Farhod Xalmuratov spirtli ichimliklar ichib, oʻz turmush oʻrtogʻi, yaʼni sudlanuvchining qaynonasi Gulshod Jumaniyazova bilan oʻzaro janjallashgani sababli qaynonasi ham uning uyiga kelgan edi. 2019-yil 11-iyul kuni soat 12:30 lar atrofida qaynotasi oʻz turmush oʻrtogʻi, yaʼni sudlanuvchining qaynonasi Gulshod Jumaniyazovani olib ketish maqsadida kelinining uyiga mast holda keladi. Janjal boʻlishini istamagan kelini uyining eshigini qulflab, qaynotasini uyiga kiritmaydi. Spirtli ichimlik taʼsirida oʻz aqlu xushini yoʻqotgan qaynota esa qarshilikka qaramay, uyga kirishga harakat qiladi. Qaynotasining eshikni ocholmay, derazadan kirishga harakat qilayotganini koʻrgan kelin dastlab unga bu yerdan ketishini, uyiga borib, dam olishi kerakligini aytadi. Ammo, mast qaynota kelinining gapiga parvo qilmay, derazadan buzib kirish harakatini davom ettiradi.

Bundan achchiqlangan kelin jahl ustidami, yoki qaynonasini himoya qilish uchunmi, uyida turgan ketmon bilan qaynotasining koʻkrak qismi orqali chap tomoniga zarb bilan uradi. Zarbaga chiday olmagan, buning ustiga mast boʻlgani sababli oyogʻida zoʻrgʻa turgan qaynota shu zahoti yerga yiqiladi.

Sud-tibbiy ekspertizasining 2019-yil 25-iyul kungi 223-sonli xulosasida fuqaro Farhod Xalmuratovga hayoti va sogʻligʻi uchun xavfli boʻlgan ogʻir darajadagi shikast yetkazilganligi qayd qilinadi va kelini Poza Sobirova Oʻzbekiston Pespublikasi jinoyat kodeksi 104-moddasining 1-qismida koʻrsatilgan jinoyatni sodir qilganlikda ayblanib, tergovga jalb qilinadi.

Dastlabki tergov organi tomonidan sudlanuvchi Poza Sobirova fuqaro Farhod Xalmuratovning badaniga ogʻir shikast yetkazgani ekspertiza xulosasi va boshqa daliliy ashyolar bilan tasdiqlandi.

Sud majlisida sudlanuvchi, jabrlanuvchi va guvohlarning koʻrsamalari, davlat ayblovchisining fikri tinglandi.

Sudlanuvchi Poza Sobirovaga nisbatan jazo tayinlashda sodir etilgan jinoyatning ijtimoiy xavflilik darajasini jiddiy kamaytiruvchi holatlar eʼtiborga olindi. Jumladan, sudlanuvchining shaxsi, uning muqaddam sudlanmaganligini va jinoiy javobgarlikka tortilmaganligi, qilmishidan chin koʻngildan pushaymonligi, oilaviy sharoiti, qaramogʻida 2 nafar voyaga yetmagan farzandi borligi, arizachi Farhod Xalmuratovning sudlanuvchiga nisbatan hech qanday daʼvosining yoʻqligi inobatga olindi.

Amudaryo tuman hokimi oʻrinbosari, Xotin-qizlar qoʻmitasi raisi Maryam Ahmedova sudlanuvchini jinoiy jazodan ozod qilish toʻgʻrisidagi iltimosnoma hamda kelgusida uning salbiy holatlar sodir qilmasligi toʻgʻrisidagi kafolat xati bilan sudga murojaat qildi.

Shuningdek, “Doʻrman” ovul fuqarolar yigʻini tomonidan berilgan ijobiy tavsifnoma hamda mazkur jinoyat uncha ogʻir boʻlmagan jinoyatlar turkumiga kirishi etiborga olinib, sudlanuvchi Poza Sobirova sud hukmi bilan Oʻzbekiston Pespublikasi jinoyat kodeksining 71-moddasiga asosan jazodan toʻliq ozod qilindi.

Doʻrman ovul fuqarolar yigʻini binosida boʻlib oʻtgan ushbu sayyor sud majlisi unda ishtirok etganlarni ogohlik va xushyorlikka chorladi. Zero, muntazam ravishda spirtli ichimlik isteʼmol qilish nafaqat uni isteʼmol qilgan kishining sogʻligi va shaxsiy hayotini izdan chiqaradi, balki oilasining ham tinchini buzib, porakanda boʻlishiga sabab boʻladi.

S.Davletmuratov, Jinoyat ishlari boʻyicha Amudaryo tuman sudi raisi.