OʻZBEKISTONDA YaNGI BOLALAR MAKTABLARI TAShKIL ETILADI

Shu yil 1-oktyabrda mamlakatimiz Prezidenti Sh.Mirziyoyev “Xalq taʼlimi tizimidagi maktabdan tashqari taʼlim samaradorligini tubdan oshirish chora - tadbirlari toʻgʻrisida” qaror qabul qildi. Endilikda qarorga muvofiq Oʻzbekiston Respublikasi Xalq taʼlimi vazirligi tasarrufidagi texnik ijodiyot, badiiy ijodiyot, oʻlkashunoslik va ekologiya boʻyicha “Barkamol avlod” respublika bolalar markazlari negizida Respublika “Barkamol avlod” bolalar maktablari, Qoraqalpogʻiston respublikasi Xalq taʼlimi vazirligi va viloyatlar xalq taʼlimi boshqarmalari huzuridagi axborot- resurs markazlari negizida “Bolalar kutubxonalari”, 2020- 2023-yillarda esa Buxoro, Qashqadaryo, Namangan, Samarqand, Xorazm viloyatlari va Toshkent shahrida tizimli ravishda bolalar turizmini rivojlantirish maqsadida “Barkamol avlod” bolalar maktablari huzurida 100- 200-oʻrinli “Bolalar sayyohlik bazalari” tashkil etiladi.

Qarorga muvofiq “Bolalar kutubxonalari” umumtaʼlim muassasalari kutubxonalariga amaliy va uslubiy yordam koʻrsatadi, oʻquvchilarning milliy va jahon bolalar badiiy adabiyotlari durdona asarlariga boʻlgan ehtiyojini aniqlab, ularning kitob mutolaasi va kitobxonlik madaniyatini oshirishga qaratilgan targʻibot – tashviqot ishlarini amalga oshiradi, madaniy – maʼrifiy tadbirlarni tashkil etishga koʻmaklashadi.

“Bolalar sayyohlik bazalari” esa “Barkamol avlod” bolalar maktablarining “yosh sayyoh”, “yosh ekskursovod”, “yosh oʻlkashunos” toʻgaraklari aʼzolari uchun oʻlkamiz tarixi, qadimiy va muqaddas qadamjolar, milliy urf – odatlarimiz bilan yaqindan tanishtirishga , atrof- muhitni muhofaza qilishga va asrashga, bolalar oʻrtasida ekologiya hamda sayohat qilish madaniyatini yuksaltirishga xizmat qiladi.Yosh avlodni maʼnaviy barkamol etib tarbiyalash, ularning boʻsh vaqtlarini mazmunli oʻtkazishini taʼminlash, bunda ularning sanʼat,sport, axborot texnologiyalari, kitob oʻqishga qiziqishlarini oshirish hamda qizlarni ijtimoiy hayotga faol tayyorlash maqsadida qabul qilingan mazkur Qaror mamlakatimizda yosh avlod taʼlim – tarbiyasida muhim burilish yasashi tabiiy, albatta.Boisi, yangidan tashkil etilayotgan maktabdan tashqari taʼlim muassasalari zimmasiga bolalar qamrovini oshirish, oʻquvchilar qiziqishlariga koʻra toʻgaraklar ni tashkil etish va doimiy faoliyat olib borishini taʼminlash, bolalarda kasbni egallash boʻyicha dastlabki bilim va koʻnikmalarni shakllantirish kabi muhim va juda dolzarb , juda koʻp vazifalar yuklangan. Qaror bilan batafsil tanishgan kishi yosh avlod kelajagi uchun mamlakatimizda gʻamxoʻrliklar kun sayin kuchayayotganini chuqur his qilishi tayin.

Oygul RAJABOVA.