AMUDARYo TUMANIDA XOTIN-QIZLAR BANDLIGINI TAʼMINLASh YuZASIDAN BRIFING OʻTKAZILDI

Tadbirkorlar va ishbilarmonlar harakati Oʻzbekiston Liberal demokratik partiyasi Amudaryo tuman Kengashi va tuman xotin-qizlar qoʻmitasi hamkorligida imzolangan memorandum asosida Amudaryo tumanida 2019-yilda ish oʻrinlarini tashkil etish va aholi taʼminlash dasturi asosida xotin-qizlar bandligini taʼminlash boʻyicha joriy yilning 8 oyi davomida amalga oshirilgan ishlar yuzasidan tuman aholi bandligiga koʻmaklashish markazining hisobot brifingi oʻtkazildi.

Tadbirda Mangʻit shahri va shahar atrofidagi mahallalarda yashayotgan, bandligi taʼminlanmagan xotin-qizlar hamda fuqarolar yigʻinlarida faoliyat koʻrsatayotgan xotin-qizlar masalalari boʻyicha mutaxassislar ishtirok etishdi.

Brifingni Tadbirkorlar va ishbilarmonlar harakati Oʻzbekiston Liberal demokratik partiyasi tuman Kengashi apparat rahbari Muqaddas Beknazarova kirish soʻz bilan ochdi va boshqarib bordi.

Tadbirda tuman aholi bandligiga koʻmaklashish markazi mutaxassisi Bogʻdagul Matmurotovaning hisboti tinglandi. Hisobotda koʻrsatilishicha 2019-yilda markazga murojaat qilgan 3480 nafar fuqarodan 2031 nafari ishga joylashtirilgan boʻlib, shundan 834 nafarini yoshlar, 1012 nafarini xotin-qizlar tashkil qilgan. Joriy yilda tumanda 5 ta boʻsh ish oʻrinlari yarmarkalari tashkil etilib, ularda ishtirok etgan 156 ta korxona-tashkilotlar tomonidan 838 ta  boʻsh ish oʻrinlari taklif etilgan va 143 nafar fuqaroga ishga yoʻllanmalar berilgan. Shundan 42 nafarini yoshlar, 29 nafarini esa ayollar tashkil etgan.

Brifing ishtirokchilarining huquqiy savodxonligini oshirish maqsadida Oʻzbekiston Liberal demokratik partiyasi Qoraqalpogʻiston Respublikasi Kengashi Siyosiy taʼlim boʻlimi mudiri Nasiba Toʻramurodova “Saylov kodeksi hamda saylovlar: gʻalaba strategiyasi va taktikasi” mavzusida, soʻz yuritdi va tuman ichki ishlar boʻlimi huquqbuzarliklar profilaktikasi boʻlimining xotin-qizlar masalalari boʻyicha katta inspektori, katta leytenant Dilafruz Sharipova noqonuniy migratsiya, jinoyat kodeksi va odam savdosi haqida tushunchalar berdi.

Tadbirkorlar va ishbilarmonlar harakati Oʻzbekiston Liberal demokratik partiyasi tuman Kengashi  apparat rahbari Muqaddas Beknazarova 2020-yilda mamlakatimizda uy-joy sharoitlarini yaxshilashga ehtiyojmand mehnat migrantlariga yordamlar koʻrsatish nazarda tutilayotganligi, endilikda chet elda mushkul ahvolga tushib qolgan yordamga muhtoj mehnat migrantlarining “Labor migration” yagona mehnat tizimi doirasida masofaviy murojaat qilishlari mumkinligi haqida gapirdi.

Shuningdek, “Amu dizayni” masʼuliyati cheklangan jamiyatida faoliyat koʻrsatayotgan Gulzoda Yuldasheva tadbir ishtirokchilarini oʻz faoliyati bilan tanishtirib, dizayn boʻyicha oʻquv kurslari tashkil qilinguniga qadar ishsiz qizlar uchun bepul master klasslar tashkil etilishini maʼlum qildi.

Brifing oxirida ishtirokchilar oʻzlarini qiziqtirgan barcha savollarga javoblar oldilar.

A.JUMANIYoZOV.