MING EHTIROM OʻGʻLINGIZDAN, QIZINGIZDAN USTOZLAR!

Ustoz! Bu soʻzning tub zamirida qancha mazmun, maʼno bor-a? Inson  dunyoga kelar ekan, uning yetuk inson boʻlib yetishishida ota-onaning oʻrni qanchalik muhim boʻlsa, ustozlarning roli ham shunchalikdir. Ammo ularning oʻgit va nasihatlariga oʻz vaqtida quloq solish va amal qilishimiz kerak ekanligini anglaganimizda, afsuski, biroz kech boʻlar ekan.

Men 38-sonli maktabni bu yil aʼlo baholar bilan tugatdim. Bu maqolani yozishimga sabab, mehri daryo ustozlarimga boʻlgan sogʻinchim hamda cheksiz minnatdorchiligim hissidir. Yodimda maktabga ilk bor qadam qoʻyganimda birinchi oʻqituvchimiz qoʻlimizdan yetaklab, maktab bilan tanishtirib chiqqan edi. Menga ilk bor saboq bergan Gulnora opa Rahimova boʻladi. Bu oʻqituvchimizning dars oʻtishlari  hamon koʻz oʻngimda. 5-sinfdagi oʻqituvchilarimizdan biri Sanamjon opa Roʻzimova doim oʻquvchilarining oilaviy sharoiti bilan qiziqib, qoʻlidan kelgancha yordam berar edilar. Bir soʻz bilan aytganda, har bir oʻquvchining koʻngliga yoʻl topa oladigan va doim qoʻllab-quvvatlaydigan ustozlardan edi. Yana bir qadrli oʻqituvchimiz Gulsara opa Yusupova doimo jonkuyarligi va fidoyiligi bilan boshqa oʻqituvchilardan ajralib turadi. Bizga matematika, informatika fanlaridan dars bergan Barno opa Eshmurodova ham bizdan oʻz maslahatlarini ayamas edilar. Bu oʻqituvchilarimiz doim xurmat, eʼtiborda. Har bir inson dunyoga kelar ekan, albatta, birinchi mehribon insonlari – ota-onalari, keyin esa ustozlari boʻlarkan. Kasblar ichida eng ulugʻ va mashaqqatlisi oʻqituvchilik, deb bejiz aytishmagan. Har bir oʻquvchining yaxshi koʻrgan fani va mehr qoʻygan oʻqituvchisi boʻladi. Mening yaxshi koʻrgan oʻqituvchim – Barno opa. Doim oʻzining jonkuyarligi, yangiliklarga intiluvchanligi va cheksiz mehri bilan eʼtiborimni qozongan. Maktabimiz oʻqituvchilari bir-biridan bilimdon, oldinga intiluvchanligi bilan koʻplab yutuqlarga erishgan. Men shunday ajoyib oʻqituvchilarning shogirdi boʻlganligimdan faxrlanaman. Kelgusida oliy oʻquv yurtini tamomlab, Vatanimizga foydasi tegadigan, yurt koriga yaraydigan farzand boʻlib yetishishga harakat qilaman.

Xosiyat ZARIPOVA, 38-sonli maktab bitiruvchisi.