“BIZNING SAVDO RASTALARIMIZDA SIFATSIZ GOʻShT SOTILMAYDI”

Har qanday mamlakat ijtimoiy hayotida aholining oziq-ovqat mahsulotlariga boʻlan talabini qondirish, oziq-ovqat xavfsizligini taʼminlash xalq farovonligini yuksaltirishning muhim omili sanaladi.

Davlatmiz mustaqillikka erishgan ilk kunlaridanoq ushbu sohaga qaratilgan ulkan eʼtibori, qishloq xoʻjaligida olib borilgan islohotlarning samarasi bugun hayotimizda oʻz ifodasini topmoqda. Yaʼni aholining oziq-ovqat mahsulotlariga boʻlgan talabini toʻla qondirish, bozorlarimizda narx-navoning barqarorligini saqlashdek muhim ijtimoiy masala hal etilmoqda.

Ayni kunlarda yurtimizning, tumanimizning bozorlariga borgan kishi xuddi yoz pishiqligi davridagidek xohlagan qishloq xoʻjalik mahsulotlarini, sifatli oziq-ovqat mahsulotlarini saralab olish imkoniga ega, toʻkinlik, maʼmurlikka beixtiyor shukrona aytadi, shu totli neʼmatlarni bunyodga keltirayotgan insonlarni duo qiladi.

Xalqimizning halol rizqi sotilayotgan shunday peshtaxtalardan baʼzi nobakor insonlarning shaxsiy boylik orttirish maqsadida foydalanish holatlari ham sodir boʻlayotganligidan ommaviy axborot vositalari orqali xabardor boʻlgan tumanimiz aholisi orasida ham turli fikr-mulohazalar uygʻonayotganidan koʻz yumolmaymiz. Bu yerdan gap “Sharshara” kolbasa tsexida eshak goʻshtini mol goʻshtiga aralashtirib, mahsulot tayyorlash holati, Toshkent shahri bozorlariga uyushgan jinoiy guruhning har oyda 5 tonnadan 15 tonnagacha oʻlimtik va kasallangan mollar goʻshtiga ishlov berib savdoga chiqarib kelgani haqida borayapti.

Shularni eʼtiborga olib, bu boradagi tumanimizdagi ahvol bilan gazetxonlarni tanishtirish maqsadida tuman Veterinariya boʻlimi boshligʻi Rustam Xudoyorovni suhbatga chorladik:

- Tuman Veterinariya boʻlimi tomonidan aholining goʻsht va goʻsht mahsulotlariga boʻlgan ehtiyojini qondirish maqsadida asosan tumanimizda yirik shoxli mollar goʻsht uchun soʻyilmoqda. Soʻyiladigan mollar odam va hayvonlar uchun xos boʻlgan kasalliklarga qarshi soʻyishdan oldin veterinariya koʻrigidan oʻtkaziladi, yaʼni buning uchun soʻyiladigan qoramollarning qoni olinib, brutsellyoz kasalligiga tekshiriladi. Undan keyin soʻyiladigan qoramollarning veterinariya mutaxassislari tomonidan tana harorati oʻlchanadi. Urgʻochi qoramollarning boʻgʻoz-qisirligi aniqlanadi va ijobiy natija olingandan keyin maxsus kushxona yoki soʻyish maydonchasida soʻyishga ruxsat etiladi. Maxsus kushxona yoki soʻyish maydonchasida soʻyilgandan keyin veterinariya mutaxassislari tomonidan qoramolning ichki organlari veterinariya koʻrigidan oʻtkaziladi. Bunda taloq, jigar, qoramol kallasi va muskulli goʻshtlarda tekshirishlar oʻtkaziladi. Bu vaqtda organlarda oʻzgarish boʻlmasa, goʻsht tamgʻalanib, sotish uchun veteranariya shifokori tomonidan maʼlumotnoma beriladi. Agarda yuqorida koʻrsatilgan organlarda oʻzgarishlar boʻlsa, goʻsht qayta tekshirishdan oʻtkaziladi va yaroqsiz deb topilgan goʻsht yoʻq qilib tashlanadi.

Goʻsht sotish doʻkonlari 2 ta xonadan iborat, yaʼni sotish va nimtalash xonalari bor. Goʻsht sotish doʻkoni veterinariya-sanitariya talablariga javob berishi nazorat qilib boriladi. Buning uchun goʻsht doʻkoni toza boʻlishi, qoʻl yuvish uskunasi boʻlishi, sotuvchi va xodimlar tibbiyot koʻrigidan oʻtgan boʻlishi hamda maxsus kiyimda boʻlishi kerak.

Tumanimizda qishloq xoʻjalik hayvonlarini odam va hayvonlar uchun xos boʻlgan kasalliklardan himoya qilish uchun Qoraqalpogʻiston Respublikasi Veterinariya Qoʻmitasi tomonidan belgilab berilgan reja asosida veterinariya tadbirlari olib borilmoqda. Asosan oʻtgan 2017-yil davomida 34640 bosh qoramol oʻta xavfli kasalliklar hisoblangan bruyetsllyoz kasalligiga serologik tekshirildi. 21400 bosh qoramol tuberkullyoz kasalligiga allergik tekshirildi, quturish kasalligiga profilaktik emlash 10620 bosh qoramolda, oqsil kasalligiga profilaktik emlash 53206 bosh qoramolda, kuydirgi kasalligiga profilaktik emlash 125998 bosh qoramolda, qorason kasalligiga profilaktik emlash 14850 bosh qoramolda oʻtkazildi va bundan tashqari yuqumli kasalliklarga qarshi diagnostik, kaprologik tekshirishlar oʻtkazildi.

Tuman veterinariya boʻlimi tomonidan olib borilayotgan veterinariya tadbirlarining samaradorligi sababli hududimizda qishlok xoʻjaligi va uy hayvonlari orasida yuqumli kasalliklar qayd qilinmadi. Bundan keyin ham veterinariya mutaxasislari tomonidan belgilangan reja asosida ishlar olib boriladi va bozorlarimiz rastalarida sifatli goʻsht va goʻsht mahsulotlari sotilishiga oʻz hissamizni qoʻshamiz.

R.XUDAYaROV, Veterinariya boʻlimi boshligʻi.

Oygul Rajabova yozib oldi.