"Жайхун садоси" радиосини тингланг!
Валюталар курслари
  • 1 USD = 7909.37 -35.07
  • 1 EUR = 9306.16 +43.21
  • 1 RUB = 126.72 -1.73

Ватан ҳимоячилари кунига бағишланган байрам тадбири

Ҳар қандай давлатнинг мустақиллигини биринчи навбатда унинг ўз армияси ҳимоя қилади. Шу боис истиқлолимизнинг дастлабки кунларида — 1991 йил 6 сентябрда Ўзбекистон Мудофаа ишлари вазирлиги ташкил этилиб, 1992 йил 14 январь куни мамлакатимиз ҳудудидаги барча ҳарбий қисм ва бўлинмаларни Ўзбекистон тасарруфига ўтказиш тўғрисида қарор қабул қилинган эди. 1993 йилнинг 23 декабрида эса Ўзбекистон Pеспубликаси Олий Кенгашининг қарори билан 14 январь – Ватан ҳимоячилари куни қилиб белгиланди. Мана, бир неча йилдирки бу сана бутун мамлакатимиз бўйлаб кенг нишонланиб келинмоқда.

Марказий маданият уйида 14 январь – Ватан ҳимоячилари куни ва Қуролли Кучларимиз ташкил топганлигининг 22 йиллигига бағишланган байрам тадбири бўлиб ўтди. Тадбирда туман мудофаа ишлари бўлими ва чегара қисмлари ишчи ва хизматчилари, жамоат ташкилотлари вакиллари, аскарлар, академик лицей ва коллежлар ўқувчилари ва кенг жамоатчилик вакиллари қатнашдилар.

Тадбирни туман ҳокими ўринбосари, хотин-қизлар қўмитаси раиси Марям Аҳмедова кириш нутқи билан очди ва олиб борди.

Тадбирда туманимиз ҳокими Pажаббой Йўлдошев маъруза қилди. Таъкидланганидек, Ватанни ҳимоя қилиш, унинг дахлсизлигини сақлаш, ҳар бир фуқаронинг бурчидир. Қолаверса, ҳозирги кунда дунё бўйича, турли мафкурвий таҳдидлар, жумладан диний экстемизм, террорчилик каби ҳаракатлар мамлакатлар тинчлигига хавф солиб турган бир пайтда, миллий армиямизнинг аҳамияти ва ўрни беқиёслиги эътироф этилмоқда. Юртимизнинг озодлиги ва кун сайин обод бўлиб бораётгани, кунларимизнинг тинч ва тунларимизнинг осуда ўтаётгани ҳарбийларнинг ватанимиз сарҳадларини ҳимоя қилишдаги фидойилиги сабаблидир.

Туманимиз ҳокими ўз сўзида барча ҳарбийларга ватан ҳимоясидек олийжаноб фаолиятида омадлар тилаб, чегара постлари ўртасида ўтказилган мусобақада биринчи фахрли ўринни эгаллаган Манғит чегара пости ва иккинчи ўрин соҳиби бўлган Аёқчи чегара пости маъмуриятини туман ҳокимлигининг фхрий ёрлиғи ва эсдалик совғалари билан тақдирлади. Шу билан бирга, Ватан ҳимоячилари куни муносабати билан ўтказилган спорт мусобақаларида фахрли ўринларни эгаллаган Амударё академик лицейи, Манғит иқтисодиёт коллежи, Амударё маиший хизмат кўрсатиш коллежи вакилларига ҳам фахрий ёрлиқлар ва эсдалик совғалари топширилди.

Тадбир давомида туман мудофаа ишлари бўлими бошлиғи ўринбосари Акмал Олимов, 40-сонли умумтаълим мактабининг маънавият ва маърифат ишлари бўйича директор ўринбосари Сайёра Жумамуродова, туманимиз чегара постида хизмат вазифасини ўтаётган аскар Шерзод Анарбоевлар сўзга чиқиб, ҳаммани байрам билан табрикладилар.

Тадбир ватан ҳимоячилари кунига бағишлаб тайёрланган концерт дастури билан давом этди. Концерт дастурида, айниқса болажонлар ижро этган куй ва қўшиқлар, рақс намойишлари юракларни тўлқинлантириб, томошабинларга олам-олам завқ бағишлади.

Янгиликни бўлишинг: