"Жайхун садоси" радиосини тингланг!
Валюталар курслари
  • 1 USD = 7813.42 -33.27
  • 1 EUR = 9176.86 +9.20
  • 1 RUB = 124.19 -1.06

Эртага – тиббиёт ходимлари куни: ХАЛҚ СОFЛОМ БЎЛСА, ЭЛ-ЮPТ ОБОД БЎЛАДИ

Мамлакатимизда мустақиллик йилларида аҳолининг саломатлигини мустаҳкамлаш, меҳнатга қобилиятлилик даражасини ошириш, тиббий хизмат кўрсатиш маданиятини янада юксалтириш борасида кенг кўламли ишлар амалга оширилди. Олиб борилаётган изчил ислоҳотлар натижасида энг олис қишлоқ жойларда ҳам намунали тиббиёт масканлари қад кўтариб, замонавий тиббиёт анжомлари билан таъминланди.

Ўзбекистон Pеспубликаси Президентининг 2017 йил 29 мартдаги "Ўзбекистон Pеспубликасида бирламчи тиббий-санитария ёрдами муассасалари фаолиятини ташкил этишни янада такомиллаштириш чора-тадбирлари тўғрисида”ги Қарори эса жойлардаги қишлоқ врачлик пунктлари фаолиятини замон талаблари даражасига кўтариш йўлидаги эзгу қадам бўлди. Президент Қарорига мувофиқ ҚВПлар фаолияти оптималлаштирилиб, қишлоқ оилавий поликлиникалари ташкил этилди. Чунончи, бизнинг туманимизда фаолият юритаётган қишлоқ врачлик пунктлари негизида 7 та, яъни Қипчоқ овулида 1-сонли, Дўрман овулида 2-сонли, Оқ олтин овулида 3-сонли, Бобур номли овулда 4-сонли, Куюк кўпир овулида 5-сонли, Хитой овулида 6-сонли, Қиличбой овулида 7-сонли қишлоқ оилавий поликлиникалари ташкил этилиб, Назархон овулидаги Бердақ номли ва "Қангли” овулидаги "Қангли”  ҚВПлар сақлаб қолинди.

Шуниси эътиборга моликки, оптималлашган ҚВПлар базасида шифокорлар учун хизмат уйлари ташкил этилди ҳамда аҳолига бирламчи тиббий ёрдам кўрсатиш учун тегишли хоналар ажратилиб, зарур тиббий асбоб-анжомлар билан жиҳозланди.

Қишлоқ оилавий поликлиникаларининг қишлоқ врачлик пунктларига нисбатан аҳолига тиббий хизмат кўрсатиш самарадорлигини ошириш мақсадида қўшимча равишда терапевт, педиатор акушер-гинеколог, жарроҳ, УТТ жиҳози мутахассиси каби штат бирликлари ташкил этилиб, тор доирадаги мутахассисларнинг фаолияти йўлга қўйилди. Мазкур оилавий поликлиникаларга ўзида етишмайдиган мутахассислар ўрнини тўлдириш мақсадида туман тиббиёт бирлашмаси ва кўп тармоқли поликлиникаси мутахассис шифокорлари бириктириб қўйилди. Натижада авваллари жарроҳ ёки гинеколог-шифокор кўригидан ўтиш ёки УЗИ аппарати текширувдан ўтиш учун қишлоқ аҳолиси туман марказига қатнайдиган бўлса, эндиликда улар қишлоқ оилавий поликлиникалари фаолиятидан самарали фойдаланиш имконига эга бўлдилар.

Бугунги кунда туман кўп тармоқли марказий поликлиникаси, 7 та қишлоқ оилавий поликлиникаси ҳамда 2 та қишлоқ врачлик пунктлари ҳар куни эрталаб соат 8 00дан кечқурунги соат 20 00 гача халқимиз саломатлигини мустаҳкамлаш йўлида фаолият юритмоқда.

Аҳолига тиббий хизмат кўрсатишда "Тез тиббий ёрдам” бўлимининг тутган ўрни муҳим аҳамият касб этади. Айниқса, аҳоли соғлигига жиддий зиён етказувчи ва ҳаётига хавф туғдирувчи, яъни тўсатдан келиб чиқадиган касалликлар ҳамда сурункали касалликлар, бахтсиз ҳодисалар, ҳар хил шикастланишлар, овқатдан заҳарланиш, ҳомиладорлик, туғруқ ҳолати содир бўлган вақтда тез ва сифатли, вақтида тиббий хизмат кўрсатиш мақсадида "Тез тиббий ёрдам” бўлимида кеча-кундуз барча ёшдаги беморларга тиббий хизмат кўрсатиш учун зарур шарт-шароитлар яратилган.

Барча қулайликларга эга "Тез тиббий ёрдам” бўлими янги замонавий бинода жойлашган бўлиб, 2017 йилда косметик таъмирдан чиқарилди. Бўлим тасарруфидаги 7 та аҳолига бирламчи тез тиббий ёрдам кўрсатиш шохобчалари – Бердақ, Қипчоқ, "Тўлқин”, "Оқ олтин”, "Ўзбекистон”, Хитой ҳамда Қиличбой шохобчалари ҳамда Манғит шаҳридаги 3 та тез тиббий ёрдам кўрсатиш постлари, 1 та реанимобиль бригадаси аҳолига намунали тез тиббий хизмат кўрсатиб келмоқда.

Аҳолига бирламчи тез тиббий ёрдам кўрсатиш сифатини янада яхшилаш мақсадида туман Тиббиёт бирлашмаси томонидан янги тиббий асбоб-ускуна, анжомлар ва ЭКГ аппаратлари олиб келиниши режалаштирилган.

Ўзбекистон Pеспубликаси Президентининг 2017 йил 16 мартдаги "Шошилинч тиббий ёрдамни янада такомиллаштириш чора-тадбирлари тўғрисида”ги Фармонига мувофиқ, туман Тиббиёт бирлашмаси томонидан туманимиз аҳолисига тез тиббий ёрдам кўрсатиш тизимини янада юқори поғонага кўтариш бўйича чора-тадбирлар режаси ишлаб чиқилди. Унга кўра, туман Тиббиёт бирлашмаси ҳузуридаги шошилинч тиббий ёрдам бўлимида ўринлар сони 40 тага етказилди.

Туманимизнинг чекка қишлоқларида фаолият юритаётган қишлоқ врачлик пунктлари аҳоли соғлигини мустаҳкамлаш, турли хил юқумли касалликлар келиб чиқишининг олдини олишда муҳим ўрин тутади. Бу борада ўз фаолиятларини давом эттираётган Назархон овулидаги Бердақ ҚВП билан "Қангли” овулидаги "Қангли” ҚВПларнинг мутахассис-шифокорлари томонидан амалга оширилаётган ишлар эътиборга лойиқ. "Қангли” қишлоқ врачлик пункти 8184 нафар аҳолига хизмат кўрсатишга мўлжалланган. "Назархон” овулидаги Бердақ ҚВП эса 4349 нафар аҳолига хизмат кўрсатади.

Оптималлаштирилган ҚВПлар базасида ташкил этилган қишлоқ оилавий поликлиникалари бугунги кунда қишлоқ аҳолиси учун қулай ва ишончли тиббий хизмат кўрсатиш масканларига айланиб улгурди.

Туманимизда фаолият юритаётган 7 та қишлоқ оилавий поликлиникаларига қисқа вақт, 5 ой давомида 217421 та қатнов амалга оширилиб, 651 нафар беморга туман тиббиёт бирлашмаси ҳамда бошқа тиббий муассасаларда даволанишлари учун йўлланмалар берилди ва 502 нафар бемор шифохоналарга ётқизилди.

Аҳолини физиотерапевтик даволаш муолажалари орқали соғломлаштириш, болаларни турли касалликларга қарши эмлаш ишлари ўз вақтида олиб борилишида ҳам қишлоқ врачлик пунктлари ва қишлоқ оилавий поликлиникаларининг аҳамияти тобора ошиб бормоқда. Чет давлатларда бўлиб қайтган фуқароларни зудлик билан тиббий кўрикдан ўтказиш, агар бирон бир касаллик аниқланган тақдирда уларни соғломлаштириш, реабилитация марказларига йўлланма бериш, ёшларнинг эрта турмуш қуришининг, яқин қариндошлар никоҳининг олдини олиш, оилаларда соғлом фарзандлар туғилишини таъминлаш мақсадида профилактик тадбирлар олиб бориш ҳамда аҳолининг тиббий маданиятини юксалтириш бугунги тиббиёт тизими мутахассислари, айниқса, қишлоқ врачлик пунктлари ҳамда қишлоқ оилавий поликлиникалари шифокорларининг муҳим вазифасидир.

Чунки халқимиз соғлом бўлса, оилаларимиз тинч, оилаларимиз тинч ва осойишта бўлса, эл-юрт обод, авлодлар баркамол бўлади.

Фурсатдан фойдаланиб, узоқ йиллар эл-юрт саломатлиги йўлида фидойилик билан меҳнат қилган барча фахрийларни, ўз билим ва тажрибалари билан ёшларга ўрнак бўлиб келаётган устоз шифокорларни ва барча ҳамкасбларимни 12 ноябрь – тиббиёт ходимлари куни билан самимий табриклайман. Барчаларининг  оилаларига тотувлик, соғлик ва хотиржамлик тилайман.

Касб байрамингиз қутлуғ бўлсин, қадрли саломатлик посбонлари!

Эндирбой АБДУЛЛАЕВ, 

туман Тиббиёт бирлашмаси бошлиғи, Қорақалпоғистон Pеспубликасида хизмат кўрсатган тиббиёт ходими.

Янгиликни бўлишинг: