"Жайхун садоси" радиосини тингланг!
Валюталар курслари
  • 1 USD = 8374.1 -18.96
  • 1 EUR = 9410.81 -136.15
  • 1 RUB = 126.18 -1.32

ИСТИҚЛОЛ ВА МУСТАҚИЛ ЎЗБЕКИСТОН PАМЗИ

Истиқлолимизнинг энг олий ютуқларидан бири – юртимизда тарихан қисқа муддатда миллий давлатчилигимиз ҳуқуқий пойдевори яратилгани билан бугун ҳар қанча фахрлансак арзийди.

Ўзбекистон Pеспубликаси ўзининг 24 йиллик мустақил тараққиёт йўлида эришган барча натижалар, хусусан, инсон ҳуқуқлари ва эркинликларининг таъминланиши, давлат бошқарувининг энг самарали механизми жорий этилиши, фуқаролик жамияти асосларининг вужудга келиши ва ривожланиши каби ютуқлар Конституция ва у асосида қабул қилинган қонунларнинг изчил амалга оширилиши натижасида қўлга киритилди. Президентимиз эътироф этганидек, «Конституциямиз ўз мазмун-моҳиятига кўра халқимиз тафаккурининг маҳсули бўлиб, у давлатни давлат, миллатни миллат сифатида танитадиган қомусномадир». Унинг барча моддалари дунёда умумэътироф этилган тамойиллар, халқаро ҳуқуқ нормалари ва бошқа бир қатор халқаро ҳужжатлардаги умуминсоний тамойиллар мазмуни билан суғорилган.

Конституция (лотинча "Constitution” – тузилиш, тузук) – давлатнинг Асосий қонуни. У давлат тузилишини, ҳокимият ва бошқарув органлари тизимини, уларнинг ваколати ҳамда шакллантирилиш тартиби, сайлов тизими, фуқароларнинг ҳуқуқ ва эркинликлари, жамият ва шахснинг ўзаро муносабатлари, шунингдек, суд тизимини белгилаб беради.

Асосий Қонунимиз яратилишининг мураккаб ва муҳим, айни чоғда шарафли солномасига назар солар эканмиз, ҳеч шубҳасиз, Ўзбекистон Конституцияси халқимизнинг мустақиллик сари узоқ йўлдаги изланишлари натижаси эканига комил ишонч ҳосил қиламиз.

Миллий давлатчилигимизнинг энг муҳим қадриятларини белгилаб берадиган Асосий Қонунимиз – Ўзбекистон Pеспубликаси Конституциясида мамлакатимизда давлат ва жамият қурилишининг асосий ҳуқуқий тамойиллари ўзининг аниқ ифодасини топган бўлиб, улар орасида давлат ҳокимиятининг қонун чиқарувчи, ижро этувчи ва суд тармоқларига бўлиниши ҳал қилувчи қоида сифатида муҳрлаб қўйилган.

Ана шундай мустаҳкам ҳуқуқий  пойдевор асосида мамалакатимизда туб ислоҳотлар амалга оширилди, давлат ва хўжалик бошқарувининг таркибий тузилиши модернизация қилинди ва янгиланди, жойларда ҳокимлик институти жорий этилиб, маҳаллий ҳокимият органлари қайта ташкил қилинди, фуқароларнинг ўзини-ўзини бошқариш органлари тизими – маҳалла институти ривожланди ва мустаҳкамланди.

Диёримизда ижтимоий жиҳатдан йўналтирилган бозор иқтисодиёти асослари яратилиб, янгича иқтисодий муносабатлар механизмлари жорий этилди, тегишли инфратузилма институтлари ташкил этилди. Бугунги талабга жавоб берадиган мутлақо янги молия ва икки босқичли замонавий банк тизимлари шакллантирилиб, иқтисодиётимизнинг барча соҳа тармоқларида чуқур ислоҳотлар амалга оширилди.

Мустақиллик йилларида юртимизда мулкий муносабатлар соҳасида ҳам туб ўзгаришлар рўй берди. Мамлакатимизда кўп укладли иқтисодиёт шаклланиб, унинг таркибида хусусий мулк устувор ривожланиш имкониятига эга бўлди. Кичик бизнес ва хусусий тадбиркорлик иқтисодиётимизда нафақат ҳал қилувчи ўринни эгаллади, балки бозорларимизни зарур товар, хизматлар билан тўлдириш, одамларнинг даромади ва фаровонлигини юксалтиришнинг асосий манбаи, аҳоли бандлигини таъминлашнинг энг муҳим омилига айланди.

Биз эришган марраларнинг энг муҳими – эски тизимдан бутунлай воз кечиб, мамлакатимизни ислоҳ этиш ва демократлаштириш йўлидан дадил бораётганимиз ва бу жараённинг ҳеч қачон ортга қайтмайдиган қатъий ва изчил тус олганини бугунги кунда ҳар бир ўзбекистонлик чуқур англаб ва бутун онг-у шуури билан ҳис этиб яшамоқда.

Демократлаштириш ва либераллаштириш, биз учун принципиал жиҳатдан мутлақо янги бўлган давлатни шакллантириш, албатта, бу бир-икки йилда ҳал этиладиган вазифа эмас, балки муайян муддат билан чегараланиб қолмайдиган узоқ ва узлуксиз жараёндир.

Бугунги кунда Конституциямиз ҳақида сўз юритар эканмиз, муҳтарам Президентимиз уқтирганларидек, энг долзарб, керак бўлса, энг буюк вазифамиз – Олий Қомусимиз белгилаб, муҳрлаб берган асосий принцип ва тамойилларни ҳаётга тўлиқ татбиқ этишдан иборат.

Конституция – нафақат бугунги куннинг, балки у эртанги кунимиз, қураётган жамиятимиз истиқболини аниқлаб берувчи ҳужжат, фарзандларимиз йўлини ёритиб тургувчи маёқдир.

Шундай экан, жамиятимиз ҳаётининг мезони бўлган Конституцияни чуқур ва ҳар тамонлама ўрганишимиз, унинг маъносига етиб боришимиз, амалий ҳаётимизнинг доимий қўлланмасига айлантиришимиз даркор.

Мухтасар айтганда, Асосий Қонунимиз мамлакатимизда босқичма-босқич ва изчил амалга оширилаётган ижтимоий-иқтисодий, сиёсий-ҳуқуқий ислоҳотларни жадал ва барқарор ривожлантириш ҳамда келажакда давлатимизни равнақ топтиришни кафолатлайди.

С.Худайбергенов,

Д.Тангиров,

Ўзбекистон Pеспубликаси Олий Мажлиси Қонунчилик палатаси депутатлари.

Янгиликни бўлишинг: