"Жайхун садоси" радиосын онлайн еситиӊ!
Валюталар курслары
  • 1 USD = 8249.97 +12.13
  • 1 EUR = 9392.59 +1.14
  • 1 RUB = 124.67 -1.19

Өнерлиниң қолы алтын

«Өнерлиниң — қолы алтын» деген дана халқымыз. Шынында да өнери бар инсан ҳеш қашан ҳеш нәрсеге мүтәжлик сезбейди. Өнерли адам көпшиликтиң мүтәжин питкерип, халық алғысына миясар болады.

Өтебай Турекеев 41 жыл, әпиўайы тоғай тал ҳәм қара тал ағашынан «қара үй» соғыў менен шуғыланды. «Әке жолын – тай басар» дегениндей баласы Азаматта әкесиниң қасынан бир ели шықпай, бул кәсиптиң әлўан сырларын қунт пенен үйренди. Мине бүгин, ол, өз исиниң ҳақыйқый устасы болып жетилисти. А.Турекеев — бул өнерди даўам еттирип атырған үшинши әўлад болып есапланады. 2006-жылдан баслап исбилерменлик жумысын баслаған ол, ҳәзирги күнде бул жерде 8 адам жумыс ислейди.

— Бүгинги күнде 6,8,10,12, қанатлы қара үйлерди буйыртпа бойынша ислеп атырмыз. Кара үй соғыў күтә сабырды талап етеди. Себеби, бир қара үй қолдан он алты мәрте өтеди. Майда жумыс болғанлықтан шыдам менен, тийкарғысы меҳир менен ислеў керек – дейди, өнермент Азамат Турекеев.

Елимизде киши бизнес ҳәм жеке исбилерменликти қоллап-қуўатлаў, оларды хошаметлеў мақсетинде бир қанша таңлаўлар, көргизбелер шөлкемлестирилмекте. Атап айтқанда, республикамыз исбилерменлери, фермерлери ҳәм өнерментлериниң қатнасыўында «Ташаббус» таңлаўы өткерилип келинбекте. Өткен жыл «Ташаббус-2017» таңлаўының республикалық басқышында «Ең жақсы өнермент» бағдары бойынша Азамат Турекеев биринши орынға ылайық деп табылды ҳәм усы жылдың 16-17-май күнлери Ташкент қаласындағы жуўмақлаўшы басқышқа қатнасып лауреат болып қайтты. Сондай-ақ, ол усы жыл октябрь айында Мойнақ районында өткерилген Экофестивальда «Ең жақсы қараүй безеги» номинациясын жеңип алды.

Таңлаўдағы тийкарғы жетискенлик ата-бабаларымыздан әсирлер бойы мийрас болып киятырған қараүйлердиң көпшиликке танылыўына үлес қосты. Еле де районымыздан Азаматқа усаған өнермент азаматлардың қатары көбейе берсин деп қаламыз.

Pауаж УТЕПБЕPГЕНОВ.

Жаӊалықларды бөлисиӊ!: